Jonida Maliqi është fashionista e skenës shqiptare. Domethënë, ka qenë që para se të dilnin Instagram-i të tilla gjëra.
Kështu që, nuk kishte sesi për ditët e saj të qëndrimit në Tel Aviv, ku aktualisht po zhvillohen aktivitetet para- Eurosong, të mos merrte me vete një sasi të majme rrobash.
Ajo tregoi në një intervistë për “Eurovision DE” se sa rroba, ekzaktësisht sa, ka marrë në valixhen e saj për në Izrael.
“Kam marrë shumë”, ishte përgjigja e pritshme e Jonidës, “30 fustane, 21 palë këpucë, 6 çanta…”
Por, këto nuk i mjaftojnë. Prandaj, Jonida Maliqi angazhoi grupin e artistëve të look-ut që kur të vinin një ditë më parë, t’i sillnin të tjera rroba edhe pse qëndrimit në Tel Aviv po i vjen fundi.
Nata e parë e Eurovision Song Contest do të mbahet nesër, kurse gjysëm- finalja e dytë do të jetë në datën 18, kur Jonida Maliqi do të performojë e 14-a si përfaqësuese e Shqipërisë. Këtë vit në konkurrim janë 41 shtete.
Duhet thënë se Jonida Maliqi i ka paraprirë konkurrimit me një strategji të mirëmenduar marketimi. Prej ditësh, në Instagram-in e saj ka vetëm postime të panumërta në lidhje me Eurosong-un, ndërsa dje, në tapetin portokalli, Jonida Maliqi u shfaq me një fustan blu me ylberin përfaqësues të LGBT-së.
E pyetur nga prezantuesja e tapetit portokalli për kuptimin e veshjes së saj, Jonida u shpreh:
“Nëse jeta jote është blu, mund të zgjedhësh një ngjyrë tjetër nga ylberi.”
