Një studim i fundit ka hedhur dritë mbi disa nga vendet më “të pista” në kuzhinë, të cilat shumica prej nesh i prek çdo ditë pa e kuptuar rrezikun që mund të paraqesin për shëndetin. Edhe pse kuzhina shihet si një ambient ku pastërtia është prioritet, realiteti tregon se disa zona të caktuara janë burim i vazhdueshëm bakteresh.
Ekspertët theksojnë se problemi nuk lidhet vetëm me papastërtinë e dukshme, por me bakteret që grumbullohen në sipërfaqe që përdoren shpesh. Një nga objektet më problematike është sfungjeri i enëve. Për shkak të lagështisë dhe mbetjeve ushqimore, ai krijon një mjedis ideal për shumimin e baktereve. Në shumë raste, sfungjerët përdoren për ditë apo javë të tëra pa u dezinfektuar apo zëvendësuar, duke u kthyer në një nga burimet kryesore të ndotjes.
Po ashtu, lavamani dhe rubineti janë ndër zonat më të prekura. Duart e papastra, mbetjet e ushqimeve dhe lagështia e vazhdueshme bëjnë që këto sipërfaqe të jenë ndër më të kontaminuarat në kuzhinë. Edhe pse shpesh pastrohen, përdorimi i shpeshtë i tyre gjatë gatimit i bën të ndotura shumë shpejt.
Një tjetër pikë që shpesh neglizhohet janë dorezat e frigoriferit dhe të dollapëve. Këto sipërfaqe preken vazhdimisht gjatë përgatitjes së ushqimit, shpesh pa u larë duart ndërmjet proceseve. Si rezultat, ato mund të mbajnë baktere për një kohë të gjatë pa u vënë re.
Ekspertët paralajmërojnë gjithashtu për dërrasat e prerjes, sidomos kur përdoren për mish të papërpunuar dhe më pas për perime apo produkte të tjera pa u pastruar siç duhet. Ky veprim rrit ndjeshëm rrezikun e kontaminimit të ushqimeve.
Edhe butonat e pajisjeve elektroshtëpiake, si furra, mikrovala apo lavastovilja, janë ndër zonat që preken shpesh dhe rrallë pastrohen me kujdes. Këto sipërfaqe mund të mbledhin baktere nga duart dhe të shërbejnë si pikë përhapjeje në gjithë kuzhinën.
Për të shmangur këto rreziqe, specialistët rekomandojnë disa hapa të thjeshtë por të domosdoshëm: larja e duarve para dhe pas çdo procesi gatimi, dezinfektimi i rregullt i sipërfaqeve, ndërrimi i shpeshtë i sfungjerëve dhe përdorimi i dërrasave të ndara për mish dhe produkte të tjera.
