Jennifer Lopez-it nuk i ka munguar disiplina që në një moshë fare të hershme. Në një intervistë për kopertinën e revistës “Rolling Stone”, aktorja dhe këngëtarja e njohur është treguar e hapur duke rrëfyer detaje nga jeta familjare dhe se si marrëdhënia me mamanë e saj, Guadalupe Rodriguez e përgatiti atë për të ardhmen në industrinë e muzikës.
“Shikoni, mamaja ime ka qenë e hatashme. Ajo ka qenë personi që më shtyu drejt muzikës dhe më njohu me të gjithë dimensionet e saj. Unë ia kam dalë të argëtoj të tjerët falë mamasë sime.”-shprehet Lopez.
“Por, nga ana tjetër kam mundur t’i mbijetoj disa situatave në këtë industri vetëm sepse mamaja ime ishte e fortë. Unë nuk mendoja se ajo e dinte se për çfarë po më përgatiste, por në të vërtetë ajo e dinte.”-shtoi këngëtarja.
Javën e shkuar, Lopez rrëfeu për People detaje nga komedia romantike ku merr pjesë, “Marry Me” dhe historinë e saj të bukur të dashurisë me Ben Affleck. Ajo është shprehur se po e shijon në maksimum romancën e tyre dhe ndihet krenare që ndodhet pranë tij pas një lidhje të dështuar më parë me të.
