Për shumë të rinj dhe të reja, ai ka punën e ëndrrave, të veshësh dhe të këshillosh njerëz të famshëm të televizioneve apo ekranit shqiptar dhe jo vetëm, të bëhesh figura dhe imazhi i tyre. Kënaqësia e të punuarit si një stilist profesional, për Niko Komanin arrihet kur artistët me të cilët ai punon, evoluojnë nga stili i tyre i të veshurit, në një stil “a la Komani”.
Një nga stilistët më të njohur sot në vendin tonë tregon në një intervistë ekskluzive për portalin “ICONstyle”, se karrierën e tij e ka nisur thuajse nga zero, ndoshta me disa njohje të personazheve të famshëm vetëm përmes televizionit. Ndërkohë sot, ka arritur të punojë me një sërë emrash të njohur të kinemasë apo muzikës dhe të ketë marrëdhënie shoqërore me ta.
Sot karriera e Niko Komanit në modë nuk është shtrirë vetëm si stilist por edhe si drejtor imazhi në një televizion. Ai ka linjën e tij personale të kozmetikës dhe për të cilën tregon se është frymëzuar nga klientet e tij. Stilisti ka gjetur mënyrën më moderne dhe komode për ta prezantuar këtë linjë, përmes blerjeve online që ua këshillon të gjithëve. Gjatë intervistës Niko Komani ndan edhe disa këshilla të vlefshme për veshjet dhe aksesorët më në modë dhe sugjerime për festat e fundvitit që nuk duhet t’i humbisni.
Çfarë po e mban Nikon të zënë? Cili është angazhimi juaj i momentit?
Kam këtu e 3 vjet që pjesën më të madhe të ditës e kaloj pranë INTV duke qenë se jam aty Drejtor Imazhi.
Këto 11 muajt e fundit kam qenë i angazhuar dhe me linjën time personale #MorphineCosmetics e cila më ka “ngrënë” kohë mjaftueshëm duke qenë se si projekt personal, më duhej ta kuroja më shumë se çdo gjë tjetër. Produktet janë në treg këtu e 5 muaj por thashë më parë 11 muaj, duke qenë se përgatitja e këtij projekti mbajti muaj të tërë. Kontrata me kompaninë, e cila me hapi dyert dhe ishte e gatshme për këtë bashkëpunim, përzgjedhja e nuancave, shisheve etj.
Ndërkohë në trurin tim mendoja që brenda javës do të mbyllet marrëveshja. Tani që kthej kokën pas, jam shumë i lumtur për këtë hap që bëra dhe ia vlente aq lodhje.
Ju keni thënë shpesh herë që frymëzoheni nga filmat, personazhet apo edhe nga “cartoons”. Kush është “muza” juaj e momentit?
Është e vërtetë që inspirohem nga shumë situata momentale. Për shembull kur vendosa të kem një linjë kozmetike, muzat e mia ishin klientet e mia. Doja të bëja diçka universale për “tekën” e secilës.
Momentalisht kam dy muza të cilat çuditërisht s’janë njerëz e as “cartoon” por Japonia dhe Australia. Kur mbyll sytë dhe mendoj këto dy vende, fillon inspirimi.
Çfarë mendoni para se të visheni herët në mëngjes?
Mendoj si është gjendja ime shpirtërore dhe si duhet të vishem. Mendoj gjithë planin e ditës deri sa vishem… por ka dhe herë që kombinimet e gjendjes time emocionale më lindin pyetjen para pasqyrës: Can people handle me like this? (A do të më rezistojnë njerëzit kështu?)
Cila është veshja më e çmuar që keni në gardërobë?
Kam qenë gjithmonë shumë diskret me shifrat sepse s’më pëlqejnë komentet. Por e vërteta është që gardëroba ime ka më shumë se një aksesor apo veshje të çmuara.
Kë rrobë/aksesor nuk do ta shohim kurrë të veshur nga ju?
Hmmm… Vitet e fundit moda më ka mësuar që kurrë mos të them kurrë përveç mokasinet që i evitoj pafund. Aspak të bukura estitikisht për syrin tim.
Ju punoni me njerëz të famshëm, cila është gjëja më e vështirë kur vesh dikë që ka krijuar një imazh të tijin?
Kam pasur fatin që me artistët që kam punuar të jenë goxha open-minded dhe të duan vetë të bëjnë diçka si stili im.
Koha më ka treguar që të gjithë artistët kur kanë ardhur për bashkëpunim kanë dashur ato idetë e mia jashtë kufijve, ngjyra në maksimum dhe veshje nga perëndimi apo “catwalks”. Pra kanë qenë ato të disponueshme të ndryshojnë për të arritur të flasim të njëjtën gjuhë artistike dhe aspak lodhje nga ana ime të mësohem me imazhin e tyre.
Është kënaqësi të evolosh një artist nga stili i vet në diçka zhurmuese dhe me një stil “a la Komani”.
Keni ndonjë personazh shqiptar që do të donit ta vishnit apo t’i jepnin disa këshilla stili dhe mode?
Jo se besoj. Kam pasur fatin të punoj me kë kam dashur. Kur erdha nga Greqia, në vendin që isha rritur, formuar dhe edukuar mbi modën, njihja disa nga artistët tonë nëpërmjet televizionit apo hiteve të tyre. Kur erdha në Shqipëri kisha dëshirën të punoja me ta. Me shumicën kam punuar dhe kam pasur fatin të mbaj marrëdhënie të mira por dhe shoqërore. Me ato pak që nuk kam bashkëpunuar mendoj që thjesht s’ka rastisur akoma momenti perfekt.
Sa rëndësi u kushtoni markave origjinale? Cilat janë brand-et tuaja të preferuara?
Dikur kam qenë i fiksuar totalisht për “brands”. Duke u rritur dhe duke u përplasur me kompani botërore të tjera kam mësuar të vlerësoj gjithçka. Më pëlqen të guxoj të bashkëpunoj me kompani jo aq të njohura sa Marc Jacobs, por njëkohësisht aq të shtrenjta sa Jeremy Scott.
Ka rastisur që kam bashkëpunuar për klipin e Tunës #Pardon me linjën e veshjeve WIA COLLECTION e cila veshi Tunën kokë e këmbë në atë projekt, por nuk ishte aq e njohur akoma si linjë veshjesh dhe një vit më vonë rastisi që Rihanna veshi të njëjtin kombinim me Tunën apo Rita Ora të njëjtit aksesorë me Tunën. Pra më pëlqen të bashkëpunoj me të gjithë dhe të jap mundësinë në çdo projektin tim të kem sa më shumë “brands” të cilat do të më nxjerrin faqebardhë pas disa kohësh.
A bëni shopping online? Çfarë blini zakonisht dhe keni ndonjë këshillë për ata që preferojnë të blejnë nga shtëpia?
Linja ime e kozmetikës është një markë që shitet online, “online brand”, pra normalisht që jam 100% PRO blerjeve online. Është shumë komode, por dhe të sjell akoma më afër me produktin që dëshiron. Mjafton të shtypni butonin “Buy Now” (qesh).
Sipas jush, viti 2017 do të jetë viti i kujt stili apo veshje/aksesori?
Edhe pse jam lodhur duke e thënë, edhe këtë vit që presim,“OVERSIZED” është në fronin e vet dhe nuk po u lodhet njerëzve.
Çfarë duhet dhe çfarë nuk duhet të veshim gjatë festave të fundvitit?
Për këto festa vishni materiale velvet, mëndafsh, shimmery, lëkurë dhe dantella. Detajet si “chockers” me gurë apo gold do të jenë shumë “In” në këto festa si dhe makijazhi sa më festiv. Detaj tjetër shumë “In” jane glitters, mund t’i përdorni në sy, buzë, mollëza (të kombinuara me highlight-in tuaj) por dhe në flokë.
Do sugjeroja mos u vishni si për dasmë. Vitet e fundit festat e fundvitit janë bërë më moderne se kombinimet e 90’s me kostume me shkëlqim dhe maxi/fustane me temina.
Be yourself! (Ji vetvetja)
Burimi: ICONstyle
