Nëntë vite pasi hapi blogun e saj në 2008-n, Gwyneth Paltrow vendosi që ta kthejë edhe në revistë.
Lajmin e bëri të ditur vetë aktorja në “Twitter”, ndërsa mësohet se për këtë projekt të ri editorial Gwyneth Paltrow po punon me drejtuesen e “Vogue America”, Anna Wintour.
“Gjithmonë e kam ditur se Gwyneth ka shumë shije dhe vizion, por me “Goop”, ka ndërtuar diçka të jashtëzakonshme, një përshkrim modern i mënyrës së jetesës së sotme”, ka thënë Wintour.
44-vjeçarja Gwyneth Paltrow, fituese e çmimit “Oscar” si aktorja më e mirë në rolin kryesor në 1999 për “Shakespeare in Love”, e krijoi “Goop” si një koncept, një faqe që ofron sugjerime për lexuesit, duke përfshirë ushqimin e shëndetin, udhëtime e bukurinë.
“Goop” është edhe një markë që projekton veshje , kozmetikë e parfume , të gjitha në shitje në website.
Në 2016-n, “Goop” që ndërkohë u bë edhe një markë, përveç se një blog i administruar nga aktorja dhe skuadra e saj, ka arritur 700 mijë abonentë dhe 1 milion vizitorë në ditë, të dhëna të konsiderueshme për një projekt i nisur si një buletin i thjeshtë.
