Piramida e Tiranës do të marrë një tjetër formë, shumë shpejt godina do të bëhet me xhama transparentë dhe do të lejojë dritën të futet brenda ndërtesës.
Projekti i ri për rikonstruktimin e saj synon ta kthejë atë në simbolin e ri të Tiranës dhe t’i japë jetë godinës disa vjeçare.
Gjatë prezantimit të projektit kryebashkiaku Veliaj theksoi se Piramida do të ruajë disa veti nga forma e saj fillestare , siç është rrëshqitja nga muret e saj.
“Për ata që e admirojnë këtë vend, qoftë edhe për rrëshqitjen, edhe ajo do të bëhet më e mirë. Do të kemi një përdorim të kësaj ndërtese që sot është si një zhguall nga lart për pjesët soditëse, për pjesët turistike, për vizitorët dhe për ata që duan të kenë një pamje panaromike të Tiranës. Dhe për njerëz që do të shkojnë të bëjnë kursin e kompjuterit ngjitur me zyrën e kryeministrit, unë nuk besoj se do të kishte një adresë më tunduese për të shkuar dhe mësuar teknologjinë e informacionit” – tha Veliaj në fjalimin e tij.
Ai shtoi se krahas projektit rikonstruktues të kësaj godine, ajo që do të marrë rëndësi të madhe është edhe zbatimi i projektit TUMO, që pretendon ta kthejë Tiranën në një nga qendrat më të mëdha të zhvillimit të teknologjisë krijuese në rajon.
“Më vjen mirë që sot Tirana dhe Parisi janë dy stacionet e reja të TUMO-s dhe tani do të jemi në garë me kolegët tanë në Paris për të përgatitur terrenin. Në njëfarë mënyre do të jetë pallati i pionerëve për teknologjinë e informacionit, që në 15 vitet e ardhshme do të kemi mundësinë t’i përdorim” – u shpreh më tej Veliaj.
Kryebashkiaku vlerësoi bashkëpunimin me AADF për suksesin e këtij projekti dhe tha se ky do të jetë një tjetër xhevahir i Tiranës, pas Sheshit Skendërbej dhe Pazarit të Ri.
“Në Tiranë do të fillojmë të kodojmë, të merremi me robotikë, me inteligjencë artificiale, software desing dhe të gjitha programet që kemi dëgjuar nga miqtë tanë nga Armenia nga mosha 5 deri në 35 apo 45 vjeç. Sigurisht fokusi më i madh do të jetë tek ata që janë në moshë shkollore, por sigurisht do të kemi programe të veçanta edhe për më të rriturit. Nuk do të jetë një tjetër shkollë ku dikush shkon me detyrim, por një ambient argëtues ku do të shkohet me qejf” – tha Veliaj.
Piramida do të shërbejë si një inkubator për bizneset në fushën e inovacionit, artit dhe kreativitetit.
Programet që do të ofrohen nga TUMO janë: Animacion, zhvillimi i lojërave , kinematografi, web design,muzikë, shkrim, vizatim, modelimi 3D, fotografi, media, robotikë etj.
