Një nga problemet më të mëdha të telekomunikacionit në vendin tonë mbeten paketat roaming. Shumë është thënë e premtuar rreth tyre e ende vijon të thuhet, por praktika lë shumë për të dëshiruar.
Tarifa e “Roaming”-ut nënkupton telekomunikimin dhe shërbimin që qytetarët e përdorin në një shtet tjetër, nga një qendër e operatorit të telefonisë së lëvizshme.
Kompanitë celulare në Shqipëri kanë gjetur rastin që të abuzojnë edhe më këto tarifa që janë shumëfish më të larta sesa ato që përdoren për telekomunikim në vendet fqinje.
Duke nisur nga viti 2017, qytetarët e Bashkimit Europiane kanë akses në internet dhe telefonojnë të gjithë shtetet anëtare me të njëjtat tarifa në fuqi në vendin e tyre, pa shpenzime shtesë.
E kundërta ndodh në vendin tonë, ku autoritetet përgjegjëse prej vitesh kanë premtuar këtë gjë, por në realitet qytetarët po përballen jo vetëm me çmime të larta por edhe me paketa gjysmake. (KLIKO)
Ç’U THA NË SAMITIN E 3-TË DIXHITAL TË BALLKANIT PERËNDIMOR!
Në fund të tetorit u hap në Tiranë Samiti i tretë Dixhital i Ballkanit Perëndimor, duke vazhduar traditën e filluar në Samitin e Shkupit në vitin 2018. Kjo u pasua nga një Samit në Beograd në 2019, kur u nënshkrua Marrëveshja Rajonale për Uljen e Çmimeve të Roaming.
Vitin e kaluar në Beograd, ministrat e linjës të gjashtë ekonomive të Ballkanit Perëndimor nënshkruan Marrëveshjen Rajonale për Uljen e Çmimeve të Roamingut, e para e këtij lloji.
Sekretarja e Përgjithshme e Këshillit të Bashkëpunimit Rajonal (RCC) Majlinda Bregu në hapjen e Samitit në kryeqytet tha se hapi tjetër është eliminimi i kostove të roamingut për të gjithë rajonin nga korriku 2021.
“Është një shenjë e rëndësishme e bashkëpunimit rajonal dhe integrimit ekonomik, pasi tashmë ka dhënë rezultate. Tani paguajmë ndërmjet 83 dhe 96 përqind më pak çmime të roamingut në të gjithë Ballkanin Perëndimor. Hapi tjetër është eliminimi i kostove të roamingut për të gjithë rajonin nga korriku 2021. Qëllimi afatmesëm është ulja e çmimeve të roaming-ut midis rajonit dhe Bashkimit Evropian”.
Të njëjtën gjë tha edhe kryeministri Rama në fjalën e tij, duke u shprehur se në fund të këtij procesi kanë si synim që të heqin tarifat roaming. Sipas tij, mbështetur në memorandumin për rrjetin 5G vendi mund të ecë përpara, në të ardhmen e afërt për të menaxhuar spektrin e teknologjisë së pastër dhe të sigurt, duke përgatitur po kështu marrëveshjet ndër- rajonale. (KLIKO)
“iconstyle.al” ka treguar disa herë, falë denoncimeve të qytetarëve, abuzimet që bëhen me paketat e ashtuquajtura “Roaming”.
Sa duhet tu besojmë këtyre premtimeve nisur nga realiteti?!
Risjellim në vëmendje se Autoriteti i Komunikimeve Elektronike dhe Postare (AKEP) nxori për konsultim dokumentin publik për rregullimin e Tarifave të Shërbimeve Roaming Ndërkombëtar Shqipëri-Kosovë në 2019. Nga 1 korriku i atij viti, premtohej se shtetasit shqiptarë do të flisnin në celular me tarifa më të lira ‘Roamingu’, dhe duke filluar nga korriku i vitit 2020 ose 2021 tarifat do hiqen plotësisht.
Dokumenti është hartuar pasi më datë 26.11.2018 në mbledhjen e përbashkët të Qeverive të Republikës së Shqipërisë dhe Republikës së Kosovës, ministritë përgjegjëse për fushën e komunikimeve elektronike të dy vendeve nënshkruan “Marrëveshje për heqjen e cmimeve të shërbimeve roaming për rrjetet publike të komunikimeve të lëvizshme ndërmjet Republikës së Kosovës dhe Republikës së Shqipërisë”. Ministritë përgjegjëse ranë dakord që zbatimi i regjimit të ri të fillojë gradualisht nga 15 qershor 2019, sipas një plani dhe afateve të rëna dakord ndërmjet rregullatorëve.
Në lidhje me bazën ligjore të rregullimit të tarifave roaming marreshja parashikon që brenda datës 30 mars 2019 të dy vendet të kenë marra masa për miratim të cdo ndryshimi ligjor për komunikimet elektronike që të mundësojë zbatimin e marrveshjes nga rregullatorët e dy vendeve (AKEP për Shqipërinë dhe ARKEP për Kosovën).
Çfarë pritej dhe çfarë ndodh!
Ndonëse sipas dokumetave zyrtare rruga drejt heqjes së ‘Roaming’ ka nisur prej dy vitesh, në realitet po ndodh e kundërta. Në fakt, këto paketa janë shumë të shtrenjat po t’i krahasojmë me vendet e tjera.
Nga krahasimi që bëmë me vendet fqinje, Greqi dhe Itali, të kompanisë celulare “Vodafone” vumë re se në vendin tonë paketat kishin çmime shumë herë më të larta dhe ofronin shumë pak.
Të gjitha këto krahasime, ju mund t’i lexoni duke klikuar në linkun KËTU. Sikur të mos mjaftonte fakti se qytetarët shqiptarë tarifohen shumë për pak, ky shërbim le shumë për të dëshiruar.
Ishin të pafundme pakënaqësitë e qytetarëve në sondazhin e “iconstyle.al” të organizuar disa javë më parë, ku shpreheshin se pothuajse gjithmonë kanë hasur në probleme me ‘Roaming’, ku më së shumti përmenden: 1.Paketa thjesht nuk funksionon dhe 2.Minutat, SMS dhe MB/GB më parë mbrarohen sesa aktivizohen.
Mirëpo, ka edhe më keq. Qytetarët kanë treguar se paketa ‘Roaming’ ndonëse është e aktivizuar nuk funksionon pasi kalon kufirin e Republikës së Shqipërisë. Kjo në fakt ngre pikëpyetje të shumta, edhe lidhur me heqjen e ‘Roaming’ që duhet të bëhet të paktën deri në korrik të 2021. Një fakt i tillë tregon se kompanitë telefonike nuk kanë investuar në infrastrukturën e linjave, duke përdorur ende një infrastrukturë të pasofistikuar.
Si duket interesat e vogla të tyre kundrejt kësaj çështje, kanë lënë komplet në hije mbulimin e territorit të Kosovës, por jo vetëm. Pak javë më parë në fakt ju treguam se edhe mbulimi i zonave të veçanta të vendit me rrjet të shërbimeve celulare mbetet një problem ende në vitin 2020. Bëhet fjalë kryesisht për zona larg kryeqytetit dhe qyteteve të mëdha, ku operatorët nuk kanë interes ekonomik për të vendosur rrjetet e tyre të shërbimit, për shkak të numrit të pakët të abonentëve. (KLIKO)
