Do t’ju pëlqente të dëgjonit një këngë nga Era IStrefi, Dua Lipa, Bebe Rexha dhe Rita Ora? Katër shqiptaret më të famshme në tregun ndërkombëtar të muzikës, po pushtojnë top-listat në shumë shtete.
Një bashkëpunim i mundshëm mes tyre po flitet e po dëshirohet nga fansat nëpër rrjete sociale. Më 17 shkurt Bebe Rexha shkroi në Twitter se i do fort tre këngëtaret tjera, ndërsa fansat e saj e kanë pëlqyer idenë se katërshja mund ta bombardojë skenën botërore të muzikës, me një bashkëpunim, secili me stilin e vet unik.
Në anën tjetër, faqja “Image of Kosovo” (Imazhi i Kosovës) në Facebook ka shkruar se, një bashkëpunim nga katër këngëtaret po pritet shumë shpejt, por nuk janë dhënë më shumë detaje.
Secila prej tyre po vijon me karrierën solo. Dua Lipa ka publikuar videoklipin e “Thinking ‘bout you”, Era Istrefi nesër vjen me “Redrum”, Rita Ora momentalisht ka ndalur punën me muzikën për t’u përqëndrruar në projektin televiziv ,ndërsa, Bebe Rexha ka nxjerrë albumin më të ri.
