Edhe lakuriqësia është një “veshje”, është një paraqitje. Tre vite më parë kur Daniel Radcliffe doli nudo në skenën e “Teatrit të Londrës”, u quajt “shfaqja më e mediatizuar e viteve të fundit”, ndërsa sot duket se përjetuam të njëjtën situatën në” Teatrin Kombëtar”.
“Equus”, trilleri psikologjik tronditës i shkrimtarit britanik Peter Shaffer, bëri që për herë të parë në skenën shqiptare, një aktor të shfaqet krejtësisht nudo, krejtësisht i lirë.
Dino Mustafiç, boshnjaku me origjinë shqiptarë solli një teatër të fortë bashkëkohor duke i mëshuar lirisë, por edhe duke sjellë për të parën herë një aktor nudo në këtë skenë.
“Jo nuk është nudo. Ai është kostumi i tij. Alani jonë kalëron në natyrë. Ai kënaqet me lirinë. Dhe ne jemi të lirë kur nuk i kemi rrobat tona. Trupi është instrument i aktorit. Trupi në skenë kurrë nuk është provokim. Ai na ka frymëzuar për art që nga koha e Mikelanxhelos e deri më sot. Nëse bukuria mund të jetë provokim atëherë e kam bërë qëllimisht”, tha regjisori Dino Mustafiç.
“Kam përshtypjen se të dalësh nudo është një ndjenjë lirie që rrallë njerëz e provojnë. Problemi është se shoqëria nuk e kupton”, u shpreh aktori Igli Zarka.
Kur vepra angleze me autor Peter Shaffer u vu për herë të parë i dha një fshikullimë të mirë moralit të një shoqërie të kalbur dhe trajtoi tema që bënë bujë.
Igli Zarka luan rolin e 17-vjeçarit Alan Strang, i shtruar në një spital psikiatrik pasi verboi 6 kuaj. Ai nuk i urren kuajt: ka një fiksim patologjik me ta. Një rol shumë sfidues, jo sepse duhet të dalësh nudo.
Psikologu Dysart, i luajtur nga Timo Flloko, përpiqet ta çlirojë këtë adoleshent nga frikat e tij. Frika që siç duket, e kanë fillin tek marrëdhënia e ndrydhur me prindërit, nënën e luajtur nga Ema Andrea dhe babanë, Arben Derhemi.
Prandaj Mustafiç thotë se kjo shfaqje është një sfidë jo vetëm për regjisorët dhe aktorët, por edhe për publikun: një sprovë nëse jemi apo jo aq të lirë sa e quajmë veten.
Një triller psikologjik me emocione të forta dhe mjete dramatike “Equus” vjen premierë prej 17 marsit duke sjellë protagonist në teatër edhe Timo Fllokon.
