Më 2 nëntor nisi viti i ri akademik 2020-2021, por këtë vit ndryshe nga çdo herë tjetër, pasi studentët u përballën me mësimin online për shkak të pandemisë.
E ndonëse të gjithë ishim të vetëdijshëm se kjo ishte e pashmangshme, ministria e Arsimit, apo vetë universitetet nuk ndërmorën asnjë veprim apo plan konkret për të shmangur kaosin e krijuar javën e parë, e që po vijon ende edhe në këtë javë të dytë.
Ndryshe nga semestri i dytë i vitit akademik 2019-2020, kur u përdor platformat “Google Meet” dhe “Google Classroom” për zhvillimin e orëve mësimore, këtë vit studentët po i zhvillojnë orët mësimore në një platofrmë të re dhe të panjohur siç është “Microsoft Teams”.
Universiteti i Tiranës u zotua se ka në përdorim të tij Microsoft Office 365 Education, që mundëson ndërtimin e klasave bashkëpunuese, lidhjet në komunitetet e të mësuarit profesional dhe lidhjet me kolegët dhe ky shërbim ofrohet falas për Institucionin tonë.
Për më tepër u njoftua se pedagogët janë trajnuar për përdorimin e tij dhe se është shumë praktik edhe për studentët. Por, ajo që po ndodh është krejt e kundërta.
Cilat janë problemet që po hasin studentët me këtë aplikacion?
Së pari, “Teams” ka shumë probleme teknike, që nga shkëputjet e vazhdueshme, tek mosfunksionimi i mikrofonit (audios), imazhit, etj.
Ja panorama e një ore mësimi:
Së dyti, studentët mund të largojnë njëri-tjetrin nga ora e mësimit kur të duan. Kjo pasi ky aplikacion të ofron mundësinë që gjatë mësimit të klikoni në emrin e një studenti të caktuar, ku shfaqet aplikacioni “Remove from meeting”.
Por, nëse studentët mund të largojnë kë të duan nga mësim si mund të sigurohet mbarëvajtja e tij?
Së treti, përveçse mund të largojnë njëri-tjetrin nga mësimi, studentët mund të ndërhyjnë edhe tek detyrat e njëri-tjetrit, duke i ndryshuar ato, apo edhe duke i fshirë. (MOS E PROVONI KËTË NË SHTËPI)
Së katërti, stafi pedagogjik ende nuk di ta përdorë këtë aplikacion dhe janë plotësisht të justifikuar, duke qenë se vendimi për mësimin online u dha vetëm 3 ditë para. Ndonëse pretendohet se ata janë trajnuar diçka e tillë nuk ka ndodhur dhe ky program është edhe për ta fare i panjohur.
Nëse edhe ju keni ende vështirësi në përdorimin e TEAMS mund të klikoni KËTU, për disa udhëzime.
Cilat janë pasojat e tjera që solli vendimi i vonuar për zhvillimin e mësimin online?
Një pjesë e mirë e studentëve në Universitetin e Tiranës jetojnë në qytete të ndryshme të Shqipërisë e po ashtu, edhe në Universitetet që ndodhen në rrethe të tjera ka studentë që nuk jetojnë brenda rrethit a qytetit. Kështu, pjesa më e madhe e tyre tashmë ka marrë shtëpitë me qira për të cilat kanë paguar edhe muajin tetor, në disa raste edhe atë nëntor.
E gjithë ky shpenzim tashmë hidhet poshtë. Duken i shtuar kësaj edhe faktin se qiratë në kryeqytet kapin shifrat marramendëse, duke u renditur si qyteti me çmimet më të larta në rajon sa i përket qiradhënies.
Sikur mos të mjaftonte ky fakt, Komiteti propozoi që vetëm një muaj të jetë online, ndërsa vendimi për vijimin e tij të merret në varësi të situatës që do paraqitet në nëntor. Kjo i ka lënë studentët në udhëkryq, nëse duhet të qëndrojnë në Tiranë, nëse do u kthehen auditorëve në muajin dhjetor ao të kthehen në shtëpitë e tyre. në të dyja rastet ka sërish shpenzime ekstra dhe të panevojshme.
Nëse qëndrojnë në Tiranë dhe mësimi bëhet online, sërish shpenzimet e tyre do jenë të kota dhe për muajin dhjetor. Ndërsa nëse kthehen në shtëpitë e tyre dhe mësimi në muajin dhjetor do zhvillohet në auditorë do kenë vështirësi në gjetjen e shtëpive dhe risistemimin e tyre në kryeqytet.
Qeveria mund të kishte qenë më e shpejt duke mos i lënë studentë të në mes të udhëkryqit nëse vendimin do e kishte marrë që në shtator. Sikundër e përmendëm edhe më lartë, mjaftoi vetëm java e parë e mësimit në gjimnaze e 9-vjeçare për të kuptuar se fakti se në këto institucione nuk forohet kushtet e duhura, nuk mund të zhvillohet mësim në kushte pandemie.
Duke qenë se semestri i dytë i vitit akademik 2019-2020 u zhvillua online, atëherë Universitetet janë më të përgatitura dhe teksa qeveria humbi kohë kot mund të kishte punuar në përmirësimin e tij.
Kujtojmë se mësimi në universitete për vitin akademik 2019-2020nisi javën e dytë të tetorit të 2019, u ndërpre për disa kohë në fund të nëntorit pas tërmetit fatal. Kjo ndërprerje u pasua më pas nga festat e fundvitit, për tu finalizuar në mars pas mbërritjes së Covid-19 edhe në vendin tonë. (KLIKO)
Megjithatë, studentët i paguan tarifat dhe sërish për këtë vit akademik ka mundësi të përsëritet i njëjti skenar. Disa Universitetet i paguajnë tarifat që në nisje të vitit të ri mësimor, kurse kjo gjë pritet të ndodhë edhe për të tjerët.
Krah vendimit, studentët nuk morën asnjë përgjigje lidhur me tarifat nëse duhet t’i paguajnë apo jo. Nëse po, përse duhet t’i paguajnë tarifat e plota ndonëse nuk e frekuentojnë auditorë.
