28,432 të infektuar dhe 631 humbje jete- është ky bilanci i deritanishëm i Covid-19 në vendin tonë, teksa situata po merr çdo ditë e më shumë përmasa serioze.
Çdo ditë vendosen rekorde të reja infektimesh dhe ditën e djeshme ministria e Shëndetësisë informoi në buletinin ditor se janë shënuar 602 të infektuar.
E pavarësisht se të gjitha faktet tregojnë se vala e dytë e koronavirusit ka kapluar vendin tonë, mbetet paradoksale se si shkollat 9-vjeçare dhe ato të mesme janë ende të hapur, duke rrezikuar jo vetëm shëndetin e nxënësve dhe mësuesve, por të të gjithë qytetarëve.
Ndonëse ministria e Arsimit ka gati skenaret e tjerë që përfshijnë, njëri alternimin mësim online plus shkollë dhe tjetri që lidhet me mbylljen e shkollave dhe zhvillimin e mësimit në platformat online, asnjëra nuk po vendoset në zbatim.
Për më tepër, ministrja e Arsimi Evis Kushi ka deklaruar në daljet e saj publike se për momentin do vijohet me mësimin në shkolla.
Por, çfarë kanë vendosur vendet fqinje?
Greqia është një nga vendet me numër të lartë infektimesh nga Covid-19, ku si pasojë ka shtrënguar masat parandaluese, duke vendosur edhe mbylljen e shkollave ditën e djeshme.
Ndërkohë, Vana Papaevangelou, anëtare e Komitetit të Ekspertëve në vendin fqinj, u shpreh se vendin e pret një javë e vështirë. Më tej, shtoi se ndonëse fëmijët nën 10 vjeç e kalojnë sëmundjen lehtë, ata janë transmetues dhe mbyllja e shkollave është një mënyrë parandaluese.
Edhe Kosova në mesin e masave që mori pak ditë më parë vendosi që të gjithë shkollat e arsimit të mesëm dhe të lartë do të zhvillojnë mësimin online.
Të njëjtën rrugë po ndjekin për zhvillimin e mësimit edhe Italia, Maqedonia e Veriut dhe Mali i Zi.
Si paraqitet situata në vendin tonë?
Prej javësh në media raportohet se shkollat janë kthyer në burim infektimi. Qindra nxënës e mësues kanë rezultuar të infektuar, ndonëse vetë ministria refuzon të japë shifra zyrtare.
Deri më tani, mësuesit që e kanë humbur betejën me koronavirusin, janë nëntë. Të paktën sipas rasteve që janë pasqyruar në media.
Por, vetë Kushit nuk i bëjnë përshtypje këto shifra. Në një intervistë disa ditë më parë ajo u shpreh “Ne çdo ditë kemi mësues të infektuar por kemi dhe të shëruar.”
Padyshim që kjo deklaratë është shumë e papërshtatshme, po t’i shtosh edhe faktin se është thënë nga vetë ajo. Infektimet që ndodhin çdo ditë dhe që ministrja nuk i konsideron kthehen në zinxhir infektimesh dhe humbje jetësh.
Qeveria merr vendime në bazë të sondazheve, por lë mes problemeve mësimin online!
Prej dy javësh universitetet po zhvillojnë mësimin në platformat online, që siç e kemi parë ka lënë shumë për të dëshiruar. (KLIKO)
Vështirësitë do të jenë më të mëdha kur nxënësit e arsimit 9-vjeçar dhe të mesëm t’i drejtohen kësaj rruge. Kujtojmë se ishte një sondazh online drejtuar prindërve ai që bëri që qeveria të rikthejë në bankat e shkollës nxënësit, ndërkohë nuk është punuar me infrastrukturën e mësimit online.
Por, cilat janë disa nga problemet që do hasin nxënësit nëse do i drejtohen platformave online?
Së pari, mangësi në njohuri dixhitale!
Sipas të dhënave të Byrosë së Statistikave të Bashkimit Evropian, Eurostat, 64 për qind e të rinjve nga mosha 16 deri në 24 vjeç në Maqedoninë e Veriut, disponojnë aftësi dixhitale nga 80 % që është shifra në vendet e BE-së.
Pandemia ka nxjerrë në pah rëndësinë e përdorimit të teknologjisë, sa i përket procesit edukativo-arsimor, por mangësitë që janë vënë re në Shqipëri gjatë karantinës, e bëjnë mësimin online më pak të pëlqyer. Shumë prindër janë ankuar se nuk kanë aftësi teknologjike mjaftueshëm për t’u ardhur në ndihmë fëmijëve.
Së dyti, mësimi online nuk është i arritshëm në të gjithë vendin.
Mangësi të natyrave teknike janë regjistruar kryesisht në zonat rurale, por edhe tek familje të shumta në nevojë të cilat nuk kanë akses në internet, apo që nuk kanë mjetet e nevojshme si celularë dhe kompjuter.
Pikërisht, të zhgënjyer nga mungesa e internetit falas, programeve që mundësojnë gjithëpërfshirjen, angazhimin e mësuesve dhe leksioneve aspak aktive, shumë nxënës, prindër e mësues në Shqipëri, zgjodhën alternativën e hapjes së shkollave në shtator, edhe përkundrejt rrezikut për përhapjen e infeksioneve.
Maqedoni e Veriu vendosi disa muaj më parë që familjet që marrin ndihma sociale do të furnizohen me internet mobile prej 10 GB në muaj, me qëllim që nxënësit të ndjekin mësimin online. Me këtë veprim, këtyre nxënësve do t’u sigurohet qasje në platformat për të ndjekur me sukses vitin shkollor përmes mësimit në distancë.
Smartphone dhe internet falas për nxënësit në Shqipëri!
Nxënësve duhet t’u krijohet mundësia që t’u jepen falas tabletat apo smartphone-t si dhe interneti cilësor që në shtëpi të zhvillojnë aftësitë në shkencë e teknologji. Në të kundërt mësimi i programimit që në klasë të parë fillore do të jenë të cunguara.
Prej vitesh, nxënësit, mësuesit dhe prindërit në Shqipëri, janë gënjyer me pretendimet se teknologjia do të ishte pjesë e mësimdhënies duke harxhuar miliona euro për klasat inteligjente dhe një duzinë burimesh financiare për Reformën Kurrikulare.
Por, teksa qeveria po humb kohë me mësimin në shkolla për të plotësuar dëshirat e disa grupeve të ndryshme, mund të kishte punuar në këto aspekte në mënyrë që mos të përsëritej skenari i periudhës mars-maj, ku qindra nxënës nuk patën mundësi të ndjekin mësimin online.
