Trajneri i ri i Kombëtares pritet që të përfitojë një pagë thuajse të njëjtë, me atë të Xhani De Biazit, në sezonin e parë në krye të Shqipërisë. Burime të besueshme nga institucioni i futbollit kanë deklaruar për “Panorama Sport”, se Panuçi do të përfitojë një pagë mujore prej 20 mijë eurosh.
Kërkesat e ulëta ekonomike kanë ndikuar jo pak në përzgjedhjen e presidentit të FSHF-së, për trajnerin që do të pasojë De Biazin në krye të Kombëtares.
Prej javësh, kandidatët për postin e tetrajnerit të përfaqësueses shqiptare kanë qenë në “garë” për të bindur Armand Dukën, për të marrë drejtimin e skuadrës shqiptare të futbollit. Nga sa bëhet me dije, Panuçi do të nënshkruajë një kontratë prej 2 vitesh e katër muaj. Ai nis aventurën e tij me Shqipërinë pas disa ditësh deri në fund të këtyre kualifikueseve dhe më pas do të jetë në krye të Shqipërisë, për edicionin e ardhshëm kualifikues për Europianin e vitit 2020.
