Këtë fundjavë duhet të vini patjetër në Tiranë, që të ndjeni më afër atmosferën e festave.
Pas sheshit “Skënderbej” dy ditë më parë, dje ishte radha e Pazarit të Ri të ndriçohej nga dritat e festave të fundvitit.
Kryetari i Bashkisë së Tiranës, Erion Veliaj, ftoi fëmijët për të numëruar mbrapsht dhe për të ndezur dritat e pemës.
Me shtypjen e butonit, ai solli simbolikisht festat edhe në një nga hapësirat më të frekuentuara nga qytetarët e Tiranës dhe turistët e huaj.
Veliaj uroi muajin e festave dhe theksoi se këtë vit, Tirana, falë investimeve të bashkisë dhe të Fondit Shqiptaro-Amerikan të Zhvillimit, do të ketë dy qendra ku do të festojë.
“Nëse rrisim qytetin me dashuri dhe duhet të kemi më shumë dashuri me njëri-tjetrin. Taksat e vendosura nga bashkia për Pazarin e Ri mundësuan krijimin e zbukurimeve. Për herë të parë kemi dy vende ku do të festojmë festat e fundvitit, Krishtlindjen dhe Vitin e Ri. Kemi sheshin “Skënderbej”, që vjen si një hapësirë më e madhe kombëtare, por për herë të parë jemi këtu në Pazarin e Ri. Unë jam rritur në këtë vend prandaj e dashuroj këtë vend”, u shpreh Veliaj.
