Femrat e “Hollywood”-it e kthyen tapetin e kuq në të zi gjatë eventit të “Golden Globes”, duke u solidarizuar me viktimat e ngacmimit seksual.
Ndërsa këtë fundjavë në “Grammy Awards” duket se të gjitha do të shfaqen me trëndafila të bardhë në tapetin e kuq, në mbështetje të lëvizjes “Time’s Up”.
Anëtarët e industrisë së muzikës janë mbledhur për të formuar iniciativën e tyre të quajtur, “Voices in Entertainment”. Iniciativa ka tërhequr vëmendjen e Rita Orës, Kelly Clarkson, Dua Lipës dhe shumë emrave të tjerë të muzikës, të cilët thuhet se pritet të mbajnë trëndafila të bardhë gjatë eventit.
“Artistët e muzikës kanë shumë ndikim… Pra, është e përshtatshme që natën më të madhe të muzikës, të tregojnë mbështetjen për barazinë gjinore dhe sigurinë në vendin e punës, dhe që njerëzit duhet të jenë të vetëdijshëm për punonjësit e tyre”, thotë një prej iniciatorëve.
Vendimi për të zgjedhur një trëndafil të bardhë si simbol të lëvizjes, sipas “Huffington Post” erdhi sepse, “historikisht kjo lule ka qëndruar për shpresën, paqen dhe rezistencën”.
Nëse lëvizja do të jetë aq e suksesshme sa ajo e “Golden Globes”, mund ta imagjinojmë tapetin e “Grammy Awards” të mbushet me trëndafila të dielën.
Burimi: Harper’s Bazaar
