Kombëtarja e Shqipërisë humbi 0-1 ndaj Gjeorgjisë në Ligën e Kombeve. Në këtë 90 minutësh tanët nuk goditën asnjëherë portën, teksa “Sofascore” ka bërë edhe vlerësimet me nota.
Autori i golit, Kochorashvili ishte padyshim më i miri në fushë me notën 8,1. Ndërkohë për Shqipërinë Ylber Ramadani me 7,7 ishte më i vlerësuari, ndërsa zhgënjeu Manaj me 6,3.
Sfida nisi mjaft mirë për kuqezinjtë, të cilët tentuan disa herë nga jashtë zone me Hoxhën dhe Asllanin, por pa mundur të gjenin portën asnjëherë.
Në pjesën e dytë, miqtë u “zgjuan” të cilët provuan disa herë, ndërsa arritën të kalonin në avantazh falë Kochorashvili në minutën e 71’. Kuqezinjtë tentuan disa herë të rikthenin baraspeshën, por mbrojtja gjeorgjian ishte e organizuar mjaft mirë, duke mos u çarë dot.
Kështu Shqipëria qëndron në kuotën e tre pikëve në Grupin B1, ndërsa Gjeorgjia ruan vendin e parë me 6 pikë në dy ndeshje.
