Krimi i pasionit, që ndodhi në Tiranë mesditën e së dielës, tronditi të gjithë opinionin publik. Dy të rinjtë, Ariela Murati dhe Aldison Belulaj, u mësua se ishin në një lidhje prej katër vitesh, para se të ndaheshin dy muaj më parë, pikërisht në nëntor të 2017-s.
Por kjo nuk është pritur mirë nga i riu, i cili i ka kërkuar të riktheheshin sërish bashkë. 10 ditë para krimit të rëndë, Ariela mësohet se ndryshoi numrin e telefonit, duke ndërprerë kështu çdo komunikim me ish-të dashurin, të cilin e njihte që nga koha e gjimnazit “Sotir Capo”, në Zharrëz të Fierit.
Mësohet se Aldison Belulaj kishte disa ditë që kërkonte Arielën në Tiranë, ndërsa përballja e të dielës te Universiteti i Mjekësisë rezultoi fatale për studenten e Drejtësisë.
“Mos më vrit”! Mësohet se Ariela i është ulur në gjunjë autorit dhe i ka kërkuar të mos e vrasë.
Pas krimit, Belulaj tentoi vetëvrasjen dhe ndodhet në gjendje kritike për jetën në Spitalin e Traumës.
Trupi i studentes u përshkua nga tre plumba, në kokë, këmbë dhe dorë.
