Prej disa ditësh vendi ynë po zien nga protestat dhe rebelimet e qytetarëve, më së shumti të rinjve. Këto “kryengritje”, filluan spontanisht pas vrasjes së 25-vjeçarit Klodian Rasha nga një efektiv policie orët e para të mëngjesit së datës 8 dhjetor në Tiranë.
Protesta për Klodian Rashën ka shkaktuar bujë të madhe, megjithatë, siç ndodh shpesh në vendin tonë, edhe kjo protestë po përçahet falë ndërhyrjes së politikës, si mazhoranca, ashtu edhe opozita që po ndërhyjnë për interesat e veta. Kjo ka ndarë edhe qytetarët shqiptarë në dy kampe: Ata që protestojnë dhe i mbështesin protestat dhe ata që janë kundër tyre.
Disa ditë më parë, “iconstyle.al” zhvilloi një sondazh, lidhur me protestat, nga ku rezultoi se 72% e pjesëmarrësve në sondazh i mbështesnin protestat, 81% nuk mjaftoheshin me shkarkimin e Lleshajt, por donin reformim të strukturës së Policisë së Shtetit, dhe 69% e tyre mendojnë se përgjegjës për këtë ngjarje nuk është vetëm efektivi i forcave “Shqiponja”, por gjithë struktura.
Ajo që vumë re nga ky sondazh ishte pjesëmarrja e madhe e shqiptarëve që jetojnë jashtë shtetit, që përbënin një pjesë të konsiderueshme të votuesve. Ata ishin totalisht të ndërgjegjësuar, pajtoheshin me kauzën, kërkonin reformim të Policisë, por fatkeqësisht nuk mund të merrnin pjesë fizikisht në këto protesta dhe kjo luan një rol të rëndësishëm.
Megjithatë, shumë shqiptarë në Britani, Itali, Greqi etj., u ndërgjegjësuan dhe dolën të protestonin paqësisht, duke iu bashkuar protestuesve në vendin tonë.
View this post on Instagram
Por, a mjafton vetëm kaq?
Jo! Duhet të kenë ndikimin e tyre edhe me votë dhe të ndryshojnë gjërat që i shohin me një sy tjetër nga larg! Patriotizimi ndonjëherë nuk mjafton vetëm në komentet në rrjetet sociale e foto duke bërë gjestin simbolik të shqiponjës, por edhe duke marrë në dorë “fatin” e vendin nga i cili vjen, ose ku ke lënë familjen ose një pjesë të familjes.
Në vendin tonë nuk i është kushtuar rëndësi votimit të shqiptarëve të Diasporës, duke mos u dhënë mundësi votimi e kjo ka zbehur edhe interesin e tyre. Por, si qytetarët e Republikës së Shqipërisë, ashtu edhe shqiptarët që jetojnë jashtë duhet të kuptojnë domosdoshmërinë e pjesëmarrjes së këtyre të fundit në votim.
Janë rreth 1 milionë shqiptarë me të drejtë vote në vendin tonë, por që jetojnë jashtë kufijve, të cilëve u mohohet e drejta e votës. Por, kjo shifër kaq e madhe mund të ndryshojë dhe të përmbysë rezultatin e zgjedhjeve në vendin tonë.
Dhe kur flasim për persona që jetojnë jashtë duhet të kemi parasysh tre gjëra:
Së pari, kemi të bëjmë me një kategori e cila është shumë më pak e ndikuar nga politika. Nëse probabiliteti që qytetarët që jetojnë dhe punojnë këtu është më i madh që të “blihen”, “manipulohen”, “vendosen në presion” etj., nga politika, nuk mund të themi të njëjtën gjë për Diasporën. Shqiptarët që jetojnë jashtë janë pak ose aspak të varur nga klasa politike, e rrjedhimisht do jenë racional kur tu drejtohen kutive të votimit.
Së dyti, kjo kategori mund të cilësohet edhe si më e emancipuar. Dashur-padashur faktorët politikë, ekonomikë, socialë e kulturorë ndikojnë në mendësinë dhe pikëpamjet e një shoqërie. Rrjedhimisht, edhe mënyra se si shqiptarët të cilët jetojnë jashtë i shohin gjërat në mënyrë më kritike dhe i vlerësojnë më mirë.
Së treti, kjo kategori kontribuon në vendin tonë përmes remitancave (dërgesës së parave në vendin tonë tek familjarët). Vala e re e emigracionit të shqiptarëve në vitet e fundit ka krijuar ura të reja, që, mes të tjerash, kanë sjellë edhe rritje të flukseve të remitancave.
Një studim i Bankës së Shqipërisë, në bashkëpunim me Bankën Botërore, ka treguar se remitancat janë burim të ardhurash për rreth 26% të familjeve shqiptare. Ato kontribuojnë në arsimim, shëndetësi, investime, por sidomos në uljen e varfërisë. Së bashku me kontirbutin e tyre në ekonominë e vendit tonë, duhet tu jepet edhe e drejta themelore e votimit.
Për këto arsye, klasa politike në vendin tonë ka bërë të pamundurën që shqiptarët e Diasporës të votojnë. Qartazi ata mund të ndryshojnë rezultatin e votimeve dhe të shkaktojnë rotacione në politikë, e kjo gjë nuk u intereson politikanëve shqiptarë. Por, duhet që të ngremë ne zërin dhe të kërkojmë atë që na takon dhe atë që iu takon emigrantëve shqiptarë.
