Ndërkohë që qeveria shqiptare u thotë paturpësisht, shtetasve të vet që të bëjnë tamponin në privat, Italia ka shpallur dekretin e fundit sipas të cilit, të gjithë shqiptarët që do të udhëtojnë drejt Italisë do ju bëhet tamponi falas në aeroporte nga autoritetet italiane.
Ky lajm bëhet i ditur nga ministria e Evropës dhe Punëve të Jashtme e cila thotë se në dekretin e fundit qeveria italiane vendosi këtë ligj me qëllim mospërhapjen e koronavirusit në Itali. Të gjithë shtetasve që nuk iu kërkohet testi, do t’iu bëhet tamponi falas në aeroport dhe përgjigjia do t’u vijë pas 48 orëve.
Lajmi vjen në një kohë që qeveria shqiptare iu bën thirrje qytetarëve që të shmangin radhët në kufi me Greqinë, duke bërë tamponin në laboratorë privatë, aty ku çmimi i testeve shkon në 95 euro (shiko këtu).
Rregullat e policisë kufitare e përcaktojnë qartë se “Testimi të jetë bërë nga autoriteti shtetëror (Instituti i Shëndetësisë) ose nga çdo spital apo klinikë e certifikuar dhe e njohur nga shteti”.
Në një kohë që tamponi i COVID-19 duhet të jetë falas, sipas ligjit (shiko këtu), qeveria zgjedh që këtë shërbim t’ua kalojë strukturave private ku na duhet të paguajmë 95 euro për tamponin (për të parë nëse je i infektuar me Covid) dhe 40 mijë lekë të vjetër për analizat serologjike (për të parë nëse e ke kaluar apo jo Covid).
“Iconstyle.al” e ka ngritur vazhdimisht shqetësimin e analizave në laboratoret private të cilat duket sikur kanë rënë dakord në mënyrë që të mos e lejojnë konkurrencën për uljen e çmimeve të analizave (lexo këtu); dhe i ka kërkuar zyrtarisht Autoritetit të Konkurrencës të shohë mënyrën sesi është ndërtuar dhe funksionon kryerja e analizave.
Njoftimi i MEPJ
NJOFTIM ‼️
‼️ Ministria për Evropën dhe Punët e Jashtme, nisur nga vendimet e vendeve të ndryshme lidhur me kufizimet në regjimin e lëvizjeve të udhëtarëve, njofton se sipas Dekretit të fundit, datë 12 gusht 2020, të shtetit italian lidhur me hyrjen në territorin e Italisë, nevojitet paraqitja e testit me rezultat negativ për Covid-19 për qytetarët e Maltës, Spanjës, Greqisë dhe Kroacisë, link: http://www.salute.gov.it/portale/homeMobile.jsp.
Momentalisht, për qytetarët të cilët nuk e kanë detyrim sipas Dekretit që të paraqesin testin, autoritetet italiane kanë marrë masa që këtyre pasagjerëve t’u kryhet tamponi (falas) në momentin e mbërritjes në aeroport në mënyrë që të vijojnë më tej drejt destinacionit të tyre. Kjo masë është marrë për shtetet që nuk janë të përfshirë në Dekret, me qëllim mospërhapjen e virusit Covid-19 në Itali.
Sikurse ndodhi edhe me udhëtarët që mbërritën në aeroportin e Perugia-s me fluturimin e sotëm nga Shqipëria, ora 14:00, ekipet mjekesore italiane të vendosura në aeroport u kryen pasagjerëve tamponin falas, si dhe procedurat e tjera përfshirë deklarimin e të dhënave personale në një formular të posaçëm. Përgjigjia e tamponit do të dërgohet pas 48 orësh. Gjatë kësaj periudhe të gjithë qytetarët janë të detyruar të kryejnë karantinimin/izolimin në banesën e tyre në pritje të rezultatit.
Me qëllim parandalimin e situatave problematike në regjimin e lëvizjeve të udhëtarëve, Ministria për Evropën dhe Punët e Jashtme ju fton që të ndiqni informacion të përditësuar mbi lëvizjen jashtë vendit. Klikoni në web-in zyrtar https://bit.ly/2E2s3MZ , si dhe shfletoni rubrikën COVID -19. Në këtë hapësirë, mund të aksesoni informacionin për shtetin ku doni të lëvizni, kriteret përkatëse dhe procedurat e ligjshme që duhen plotësuar nga ana juaj, për të realizuar kalimin në shtetin tjetër.
‼️Lutemi në mirëkuptimin e çdo qytetari, që udhëtimet të ndërmerren vetëm për arsye madhore dhe të shmangen udhëtimet që nuk janë të domosdoshme.
