Ditën e sotme në mediat online u përhap me shpejtësi lajmi se shkrimtari i madh Ismail Kadare është në gjendje të rëndë shëdetësore dhe është shtuar me urgjencë në spital. Një lajm i cili u bë i ditur nga poeti Arti Lushi nëpërmjet një statusi në rrjetet sociale, i cili tregonte gjendjen e rënduar të shkrimtarit 82-vjeçar.
“Miq, më vjen keq të ndaj një lajm të hidhur me ju. Sapo më njoftuan nga spitali Arnand Trouseau në Paris që shkrimtari ynë kombëtar, Ismail Kadare ndodhet në gjendje të rëndë shëndetësore. Uroj që Zoti t’u japë forcë e kurajë familjarëve dhe të afërmve, e mbi të gjitha qetësinë për të pranuar vullnetin e epërm”, shkruante Lushi.
Mirëpo duket se kjo gjë nuk është aspak e vërtetë. Gazetarja Beti Njuma ka reaguar përmes një postimi në Facebook ku përgënjeshtron këtë lajm duke thënë se Kadare është “si kokrra e mollës”, dhe është shprehur e habitur nga ky lajm i pavërtetë.
“Një njeri i papërgjegjshëm ka përhapur këto orë lajmin se Ismail Kadare është shtruar në një spital të Parisit në gjendje të rëndë shëndetësore. Botuesi i tij Bujar Hudhri e hedh poshtë këtë ‘fake news’ duke konfirmuar se shkrimtari ynë i madh është si kokrra e mollës. Jetë të gjatë Ismail Kadaresë…”,-shkruan gazetarja në postimin e saj duke thënë se dhe vetë Kadare është habitur nga ky lajm.
