Legjenda e televizionit amerikan, Larry King, që ka intervistuar politikanë, personazhe VIP, udhëheqës botërorë, shkencëtarë, komedian, atletë e shumë e shumë të tjerë, ka ndërruar jetë. Fituesi i çmimit “Peabody” është ndarë nga jeta në moshën 87-vjeçare në një spital në Los Angeles.
Lajmi i trishtë u njoftua nga faqja e tij në Twitter. Deri më tani nuk është bërë publik ndonjë shkaktarë për vdekjen e King, por së fundmi ai u shtrua në spital për shkak të infektimit me Covid-19.
“Për 63 vite në platformat radio, televizion dhe media digjitale, mijëra intervista, çmime dhe vlerësime globale qëndrojnë si një testament i talentit të tij unik dhe të qëndrueshëm si një spiker. Larry i ka parë gjithmonë temat e intervistave si një yll i vërtetë i programeve të tij dhe veten thjesht si një kanal i paanshëm midis të ftuarve dhe audiencës”, thuhet midis të tjerash në deklaratën e bërë në profilin e Larry King.
— Larry King (@kingsthings) January 23, 2021
Ai luftoi me një sërë problemesh shëndetësore gjatë jetës së tij, duke pësuar disa sulme në zemër. Në vitin 1987, ai iu nënshtrua një operacioni bajpas, duke e frymëzuar atë për të krijuar Fondacionin e Zemrës Larry King për të siguruar ndihmë për njerëzit e pasiguruar. King zbuloi në 2017 se ai ishte diagnostikuar me kancer në mushkëri dhe iu nënshtrua një operacioni, i cili rezultoi i suksesshëm.
Për 25 vite me radhë ai ka drejtuar një nga spektaklet më të ndjekura në CNN, “Larry King Live”.
