Aktorja e njohur e serialit “Smallville”, Allison Mack, është deklaruar fajtore për shantazhimin e dy femrave si pjesë e një kulti të dyshuar në New York, të cilin e përdornin për trafikim seksual dhe krime të tjera.
36-vjeçarja pranoi akuzat para Gjyqtarit të Qarkut Nicholas Garaufis, në gjykatën federale në Brooklyn, dhe pranoi se detyroi dy gra të paidentifikuara të kryenin shërbime seksuale duke i kërcënuar se do t’u publikonte informacione sekrete.
Mack tha se ajo ishte bashkuar me sektin e udhëhequr nga udhëzuesi shpirtëror Keith Raniere, një dekadë më parë, për të gjetur qëllimin në jetë.
“Mbi të gjitha, besoja se synimet e Keith Ranier ishin të ndihmonte njerëzit”, tha ajo.
“Unë kam gabuar, tani e kuptoj se unë dhe të tjerët u përfshimë në sjellje kriminale”.
Raniere, 58 vjeç, aktualisht është arrestuar pas akuzave për trafik seksual në mars të vitit 2018. Mack u arrestua në muajin prill 2018.
NXIVM (që lexohet “Nexium”), është një kult në të cilin femrave u vendosen iniciale, mbajnë dieta strikte dhe detyrohen të bëjnë seks me Raniere.
