Një paparac, i cili u dhunua dhe u largua me një krah të thyer pasi bëri fotografi të yjeve të Hollivudit, Margot Robbie dhe Cara Delevingne në Argjentinë, ka pohuar se ishte një ‘mrekulli’ që i mbijetoi sulmit.
Pedro Alberto Orquera u sulmua nga producenti britanik i filmit Josey MacNamara dhe Jac Hopkins, të cilët u zemëruan me të kur e panë atë duke bërë foto të mikeshave të tyre duke ngrënë në një restorant të famshëm në Buenos Aires në orët e para të mëngjesit të së dielës.
Dyshja thuhet se e ndoqën Orquera-n jashtë restorantit, duke e përplasur atë në një vend me beton përpara se të tentonin t’i thyenin kamerën e paparacit.
Orquera, i cili pësoi disa gërvishtje dhe theu krahun, tha për gazetën argjentinase TN se ai ishte në gjendje të mbronte pajisjet e tij nga goditjet që kishte marrë, por me një kosto të konsiderueshme.
“Pësova një agresion brutal… Më shpëtoi jeta nga një mrekulli, nuk e di se çfarë do të kishte ndodhur nëse do të bija me kokën në tokë, me shpejtësinë që ata njerëz më ndoqën pas. Ata nuk ma morën kurrë materialin… kur rashë në tokë [kamera] u thye, por unë munda ta shpëtoja materialin”, tha fotoreporteri.
MacNamara dhe Hopkins u arrestuan nga policia dhe u morën në pyetje pas aktit të agresionit, ndërsa Robbie dhe Delevingne u larguan nga vendi i ngjarjes. Ndërkohë, Orquera u dërgua në spitalin Argerich në kryeqytetin argjentinas, ku ai vazhdon të ndjekë trajtimin fillestar dhe është në pritje të operacionit për krahun e tij të thyer. Ai i tha TN se krahu i tij ishte lënduar rëndë dhe nuk dihet nëse do ta rifitojë plotësisht përdorimin e tij.
“Unë kam një gips në krahun tim të djathtë, krahu im është shumë i lënduar dhe nuk e di nëse do ta humbas”, pohoi ai.
Aktorja dhe modelja kishin hipur në një makinë jashtë restorantit të shefit të famshëm argjentinas Francis Mallmann rreth orës 3 të mëngjesit të së dielës, kur ndodhi incidenti me Orquera. Prania e fotoreporterit zemëroi MacNamara-n dhe Hopkins-in, të cilët e ndoqën atë dhe në fund u kapën me paparac-in që po ikte, duke e nxjerrë jashtë ekuilibrit dhe duke e bërë të përplasej në tokë.
Dëshmitarët mësohet se kanë thirrur shërbimet e urgjencës kur shpërtheu sherri pasi u bë e qartë se Orquera kishte pësuar një lëndim të keq. Ndërkohë policia i mori në pyetje kineastët britanikë, dhe më pas ata dolën në gjykatë me urdhër të Prokurorisë për shkaktimin e ‘lëndimeve të rënda’.
Një raport i policisë i parë nga The Sun tregon se MacNamara dhe Hopkins u thanë oficerëve se Orquera ishte ‘përgjegjës për dëmtimet e tij’ sepse dy aktoret nuk kishin dhënë pëlqimin për t’u fotografuar.
Ndërkohë, Robbie dhe Delevingne zgjodhën të linin pas krijuesit e filmave, duke fluturuar në jug të Argjentinës vetëm disa orë pasi ndodhi sulmi.
Orquera po planifikon të ngrejë një padi kundër sulmuesve të tij, duke pretenduar se lëndimet që ai mori si rezultat i agresionit të tyre do ta pengojnë atë të jetë në gjendje të punojë.
“Gjëja më e pafat [për sulmin] është se më lë të palëvizshëm, të paaftë për të punuar apo lëvizur. Unë nuk do të jem më në gjendje të bëj asnjë punë dhe nuk e di nëse do ta kthej krahun ashtu siç duhet”, tha Orquera.
Dyshja kishin udhëtuar në Argjentinë pasi morën pjesë në ngjarjet e javës së modës në Paris në fillim të javës së kaluar, dhe Robbie u pa në Argjentinë të premten, duke ndaluar për të bërë foto me disa fansa.
Sulmi ndaj Orquera gjatë qëndrimit të yjeve në Argjentinë vjen më pak se një muaj pasi Robbie u fotografua duke dalë nga shtëpia e shoqes së saj të ngushtë në West Hollywood, me sa duket në lot, mes thashethemeve se supermodelja britanike Delevingne po luftonte me shqetësime shëndetësore.
