Një ngjarje tragjike u raportua pak kohë më parë nga “Newsbomb.al”, sipas të cilit, një 18-vjeçare nga Tirana kishte ndërruar jetë në rrethana disi misterioze.
Rasel Çarçani u shtrua në QSUT parmbrëmë por mbrëmjen e djeshme, 2 gusht, u nda nga jeta në spitalin e Tiranës.
Sakaq, mësohet se vajza kishte qenë me pushime në Pogradec por aty nuk ishte ndjerë mirë dhe për disa ditë me radhë ishte shtruar në spitalin rajonal të Pogradecit.
Një ditë para se të ndërronte jetë, familjarët duke parë gjendjen e përkeqësuar, e kanë sjellë drejt Tiranës për kurim por sipas burimeve nga QSUT ka qenë e pamundur të mbahej në jetë për shkak të sëmundjes specifike që gjithnjë referuar burimeve, nuk kishte shpëtim, kudo ku 18-vjeçarja të dërgohej.
Deri tani, prindërit e 18-vjeçares nuk kanë ngritur pretendime për shërbimin e mjekëve.
Burime pranë QSUT bëjnë me dije se vajza vuante nga meningjiti. Sëmundja e 18-vjeçares Rasel Carcani, e rrallë për moshën e saj të re, lidhet me një lloj bakteri të veçantë (meningoku).
Meningjiti është një sëmundje që prek shtresat mbrojtëse që veshin trurin. Kjo sëmundje shoqërohet me temperaturë, vjellje, dhembje të forta koke. Në qoftë se ndihma mjekësore nuk merret në kohën e duhur, i sëmuri edhe mund të vdesë.
Burimi: Newsbomb.al
