Edhe përse në deklarimet në Polici dhe Prokurori, Xhuljeta Çuni dhe Xhaferr Mata cilësohen si ish të dashur, familja e vajzës nuk e pranon këtë fakt. Për gazetën “Panorama”, familjarët e viktimës shprehen se Xhuljeta nuk ka pasur asnjë të dashur pasi prioritet i saj ishte vetëm shkolla.
“Vajza nuk e ka pasur të dashur. As nuk ka folur me të. Ai ka qenë maniak. Të paktën ju gazetarët mbroni vajzat sepse Policia nuk po vendos drejtësi. Mediat duhet t’i japin të drejtë vajzave, jo monstrave. Siç ka qenë vajza e drejtë, ne të drejtat do i kërkojmë. Fajtori edhe pse në Shqipëri nuk dënohet, të paktën të dimë kë të fajësojmë”, shprehet një i afërm i Xhuljeta Çunit.
Familjarët e 19-vjeçares shprehen të pakënaqur edhe për punën parandaluese të Policisë dhe Prokurorisë. Madje e cilësojnë si të papranueshëm lapsusin e tyre, ku në një deklaratë të Policisë, vajza e tyre cilësohej si ish-bashkëshortja e Xhaferr Matës.
