Atentati i mbrëmjes së djeshmë në ish-Bllok ishte një kasaphanë e vërtetë. Të paktën kështu shprehet një nga dëshmitarët në vendin e ngjarjes, që ishte dhe punonjës në lokalin ku ndodhi vrasja.
“Panorama” shkruan se kamerieri i lokalit është shprehur për hetuesit se ka pasur më shumë se 10 të shtëna me armë zjarri.
“Ishte një kasaphanë, gjaku ishte përhapur kudo në dysheme”, mësohet të jetë shprehur punonjësi.
Viktimë nga atentati ka mbetur Rigers Gaxha, i cili njihet si truproja e Ervis Martinajt, objektivit të atentatit.
Në momentin e të shtënave truproja e tij i doli para, duke e mbrojtur me trup.
Ndërkohë Ervis Martinaj ka marrë një plagë në qafë, por ndodhet jashtë rrezikut për jetën pas ndërhyrjes që i është bërë në spitalin e Traumës, ndërsa më pas është transportuar në një spital privat për mjekim më të specializuar.
Nga ana tjetër, Leart Hasa, ka dëmtime të shumta në bark, stomak, zorrë, mëlçi, plagë edhe në gojë, dhe gjendja e tij është tepët e rendë ndërsa ende ndodhet në sallë.
Policia ka blinduar spitalin e traumës, ndërsa po ashtu janë ngritur pika kontrolli në disa zona të kryeqytetit për të bërë të mundur identifikimin dhe arrestimin e autorit.
Si nisi konflikti
Konflikti që përfundoi me një të vrarë dhe 3 të plagosur në ish-Bllok, nisi brenda lokalit. Fillimisht ishte viktima Rigers Gaxha, i cili goditi me grusht palën kundërshtare. Me pas ka pasur shkëmbim zjarri mes tyre dhe janë përdorur 2 pistoleta.
Burimet thonë se skena ka qenë e përgjakshme dhe lokali është mbushur me gjak. Jashtë lokalit policia sekuestroi 2 mjete, të cilat dyshohet se i përkisnin palëve në konflikt një “BMW” dhe një “Honda”, njëra prej tyre ishte e ndezur.
Viktimë mbeti Rigers Gaxha, truproja e Ervis Martinit dhe Laert Hasa mik i tij. “BalkanWeb” shkruan se rreth 2 orë pas ngjarjes në një spital privat në Tiranë u paraqit një tjetër person i plagosur me armë zjarri duke e çuar në 3 numrin e të plagosurve. Policia nuk jep identitetin e të plagosurit të tretë, por motivet mbeten ende të paqarta.
