Transporti publik është bërë shpesh një shkak për shtimin e aksidenteve rrugore. Furgonat kthehen në burim aksidenti, pasi ndalojnë kudo për të marrë pasagjerë edhe në vende jo të përshtatshme.
Rreth mesditës së sotme një tjetër aksident automobilistik ka ndodhur në autostradën Tiranë-Durrës. Dy vajza kanë mbetur të plagosura dhe pasagjerët të traumatizuar psikologjikisht, pasi furgonët bënin gara se kush do t’i merrte personat që i prisnin.
Ndërsa shoferët e furgonave prisnin të bindnin pasagjerët, një kamion i ka goditur ata nga pas.
Kamioni tip “Scania” me targa AA 181 AS ka përplasur furgonin e pasagjerëve me targa AA 387 FF, i cili është përplasur me furgonin tjetër me targa AA 337 SB. Njëri prej furgonave është mbajtur vetëm nga kufizimi anësor metalik i autostradës.
Fatmirësisht vajzat janë jashtë rrezikut për jetën.
