Ish-presidenti Bamir Topi, sonte do të ketë një gëzim tjetër të madh, meqë vajza e tij e vogël, Etida, martohet me djalin e biznesmenit Luan Bregasi, Ilirin. Pas një lidhjeje disavjeçare, çifti i ri kanë vendosur ta kurorëzojnë marrëdhënien e tyre edhe me një dasmë tradicionale. Ashtu si vajza e madhe e familjes Topi, Nada, edhe për Etidën dasma do të organizohet në oborrin e shtëpisë, me 300 të ftuar, me menu tradicionale dhe me shumë të ftuar, mes të cilëve, natyrisht, do të ketë edhe shumë politikanë.
Në një rrëfim të fundit për “Bluetooth”, ish-Presidenti Topi tregon më shumë detaje nga ceremonia e dasmës, e cila ka filluar të tërheqë edhe vëmendjen e mediave gjatë kësaj jave. Si një baba që po përcjell vajzën më të vogël të familjes, ish-Presidenti tregon se nuk e vuan këtë pjesë, përkundrazi, e ka si emocion pozitiv: “Unë nuk e kam me vuajtje, por marr atë pjesën që prindi, babai duhet të gëzohet në një moment kur vajza bëhet për t’u martuar, për të vazhduar jetën. Këto janë ligjet e jetës”, tregon ai.
Dasma është organizuar në oborrin e shtëpisë, për traditë, ashtu si edhe dasma e vajzës së parë. Siç tregon më tej Bamir Topi, të ftuarit janë rreth 300 dhe mes tyre, ka natyrisht edhe politikanë, miq të familjes, ndërsa për këngëtarët, të ftuar do të jenë Kastriot Tusha, Juliana Pasha, Sidrit Bejleri, Olta Boka së bashku me bandën e tyre. Po ashtu, i ftuar mbrëmjen e sotme është edhe mjeshtri i Ansamblit, Këngës e Valles, Hekuran Xhambali. Albano Carrisi, këngëtari italian që është përmëndur këtë javë si mik special i festës mik i familjes, nuk do të jetë sonte: “Ai erdhi, bëri urimin e tij dhe u largua, sepse ka një impenjim tjetër, një koncert në Moskë”, tregon ish-presidenti Topi.
