Misteri që rrethon zhdukjen e influencers së njohur austriake, Stefanie Pieper, është thelluar edhe më tej, pasi policia ka arrestuar ish-partnerin e saj, Peter M., së bashku me dy anëtarë të familjes së tij, nën dyshime për përfshirje në rastin e saj.
Si ndodhi zhdukja?
Stefanie, 31 vjeçe, u shpall e zhdukur më 23 nëntor 2025, pasi u kthye në apartamentin e saj në Graz pas një feste Krishtlindjesh. Fillimisht ajo i dërgoi një mesazh një mikeje duke i thënë se kishte mbërritur mirë, por pak minuta më vonë, ndërsa po përgatitej të nxirrte qenin për shëtitje, ajo dërgoi një mesazh tjetër më tronditës:
“Ka një person të frikshëm në shkallë.”
Ajo përmendi edhe një “figurë të errët”, duke lënë të kuptohet se dikush po e ndiqte. Ky ishte komunikimi i fundit i saj.
Detajet që ngritën alarmin
Të nesërmen, Stefanie nuk shkoi në një fotosesion të planifikuar, gjë që shqetësoi fotografin, i cili shkoi në apartamentin e saj. Qeni i saj u gjet i vetëm brenda, ndërsa telefoni i influencers u gjet më vonë i hedhur në një shkurre pranë banesës, i fikur.
Fqinjët raportuan se kishin dëgjuar “zëra të fortë” nga apartamenti në orët kur dyshohet se ajo është zhdukur. Disa madje pohuan se panë ish-të dashurin, Peter M., pranë ndërtesës atë natë.
Arrestimi i ish-partnerit
Më 24 nëntor, Peter M. u ndalua nga policia sllovene pranë kufirit me Austrinë.
Pranë tij u gjet Volkswagen-i i tij i kuq, i djegur në parkingun e një kazinoje — një detaj që ngriti dyshime të forta, pasi ai nuk dha dot një shpjegim të qartë për zjarrin.
Peter M. dhe Stefanie kanë pasur një lidhje të gjatë, me ndarje të shpeshta, por së fundmi ishin ndarë përfundimisht. Aktualisht ai ndodhet në paraburgim dhe është në proces ekstradimi drejt Austrisë.
Arrestimet e tjera dhe hetimet në vazhdim
Së bashku me Peter M., policia ka arrestuar edhe vëllain e tij dhe bashkëshortin e nënës së tij, të cilët janë marrë më parë në pyetje edhe nga autoritetet austriake.
Hetimet po zhvillohen në bashkëpunim mes policisë austriake dhe asaj sllovene. Kërkimet vazhdojnë edhe në pronën e gjyshes së Peter M., ku janë përdorur edhe qen të specializuar.
Ndërkohë, në rrjet qarkulluan zëra se policia mund të ketë lokalizuar Stefanie-n, por autoritetet i hodhën poshtë këto pretendime, duke theksuar se hetimi është ende i hapur dhe çdo pistë po shqyrtohet me seriozitet.
