Ministri i dorëhequr Sandër Lleshaj ka qenë në një lidhje me Skype në studion e “Java në RTSH”, ku ka folur për protestën e qytetarëve gjatë këtyre ditëve pas vrasjes tragjike të Klodian Rashës.
I pyetur për informacionet që qarkullojnë se në Tiranë është dhënë urdhër për sulme të rënda, ai tha se kjo është një gjë që mund të ndodhë.
Gjithashtu, Lleshaj shtoi se në shesh ka njerëz të gënjyer, të manipuluar, të keqpërdorur dhë të droguar në disa raste.
“Dëme te pjesshme mund të bëjë kushdo. Çdo i çmendur. Por asnjë rrezik nuk ekziston dhe nuk mund te ekzistojë në kuptimin e sigurisë së përgjithshme të vendit. Sigurisht ka disa persona të gënjyer, të manipuluar, të keqpërdorur apo të droguar në disa raste. Një pjesë e protestuesve është e paguar nga ata që kanë interes për të kthyer në kauzë politike një mort tragjik. Por sfera e dëmit apo ndikimit të tyre do të jetë në kufijtë e të kontrollueshmes. Sepse qytetarët respektojnë parimet e bashkëjetesës dhe ligjet dhe distancohen nga aktet e tilla,”- tha ai ndër të tjera.
Gjithashtu, ish-ministri tregoi se kishte planifikuar të takonte familjen e të ndjerit, për të cilën kishte krijuar përshtypjen se ishte një familje e lartë.
“Me familjen e viktimës nuk kam marrë kontakte, por kam krijuar përshtypjen se është një familje jashtëzakonisht e lartë. Por intentsitet i këtyre ditëve më ka bërë të mos shkoj për vizitë. Besoj se do të shkoj të pi një kafe tek ajo familje privatisht,”- tha Lleshaj.
