Gazetari i njohur, Lutfi Dervishi ka bërë një reagim së fundmi lidhur me aksionin që qeveria mori sot në zonën e Farkës. Zëvendëskryeministrja Belinda Balluku ishte në zonën e Farkës ku identifikoi një pallat me shumë kate si ‘ndërtim pa leje’.
Gazetari ka ironizuar ashpër ku shkruan se kur “një hallexhi riparon çatinë e shtëpisë, pa marrë leje, quhet dhunues i ligjit dhe përfundon në burg” por ” konsiderohet investitor zyrtari kur ngre një pallat me 9 kate pa leje”
“Marrëzi pa fund! Kur një hallexhi riparon çatinë e shtëpisë, pa marrë leje, quhet dhunues i ligjit dhe përfundon në burg! Kur dikush ngre një pallat 9 kate pa leje, me gojën e zyrtarëve më të lartë quhet… investitor dhe i ofrohet të zgjedhë mes tre opsioneve!”, shkruan Dervishi plot nota ironie.
Kujtojmë se Balluku tha se ende nuk dihet se si ‘mbiu’ ky pallat pa leje, madje e konsideroi edhe ‘mister’.
Por ja fjala e saj:
“Ndodhemi sot në zonën e Farkës. Ky është komunikimi i parë publik që ne po bëjmë përsa i përket vendimit që u mor me VKM-në dje, që ka të bëjë me të gjitha ndërtimet pa leje ose me ndërtimet me shtesa mbi lejet që do të konfiskohen për arsye dhe përdorim të publikut. Ky është një shembull, kemi dy kate nën tokë dhe 7 kate mbi tokë. Kemi 9 kate ndërtim pa asnjë letër, sesi ka ndodhur kjo, mbetet mister për ne. Mundësia e parë është që ky objekt, më pas të shikohet mundësia për prishjen e tij. Por ne mund t’i ofrojmë investitorit që ta blejë me një çmim të tregur, por të indeksuar. Paratë do shkojnë në llogari të Bankës së Shqipërisë për shpronësime. Në variantin e dytë, investitorit do t’i ofrohet që ta dhurojë objektin për banesa sociale, apo për zyra shtetërore”, tha Balluku.
