Mund të duket e gjitha si një humor, por duhet ta merrni këtë çështje më me seriozitet. Patatet e një fshati në Librazhd kanë ngelur pa shitur dhe nuk është aspak çudi të mendoni se fajin e ka emri i vendit ku prodhohen.
Mos qeshni, por fshati quhet Stëbleva!
Pavarësisht emrit duhet të theksojmë se, patatet e prodhuara atje njihen për cilësinë e mirë si një produkt bio, rritur në lartësinë mbi 1200 metra mbi nivelin e detit.
Por prodhimi ka mbetur i mbuluar në kavaletat e vendosura nëpër ara, ndërsa fermerët thonë se një vit më parë u është dashur të hedhin më shumë se gjysmën e prodhimit.
Fermerët e kësaj zone kanë nevojë për një pikë grumbullimi, ndërsa shtojnë se me etiketën “patate Stëbleve” është abuzuar. Si pasojë e prodhimit të mbetur stok vit pas viti tashmë, fermerët nuk prodhojnë shumë si më parë.
Okej, pasi qeshët dhe u njohëm me hallin e banorëve të zonës, mund të bëni diçka për t’i ndihmuar: Blini vetëm patate që mbajnë etikën e fshatit Stëbleva.
Ose bëni një vizitë në këtë fshat, jo vetëm për të blerë patatet më të lira dhe më të mira, por edhe për të soditur bukurinë e natyrës që të ofron Stëbleva.
