Kanë kaluar vite që kur këngëtarja Malda Susuri preku zemrat e të gjithë të dashuruarve me hitin “Dashuri e hidhur”. Kënga u pëlqye dhe u memorizua aq shumë nga publiku, saqë të gjithë e dinë dhe e njohin edhe sot.
Por për të gjithë ata njerëz që e kujtojnë me nostalgji këngën dhe Maldën, “Iconstyle.al” kontaktoi me të dhe në një intervistë të shkurtër zbuluam se me çfarë surprize do të vijë Malda së shpejti.
Edhe pse është shkëputur, ajo tregon se nuk ka hequr dorë nga muzika, por shumë shpejt do të rikthehet me një projekt nga Faton Dolaku. Malda tregooi edhe një anë tjetër artistike, atë të fotografisë, dashuria për të cilën do ta rikthejë me një ekspozitë. Si një artiste e mirëfilltë, Malda u shpreh se nuk e ndan muzikën nga televizioni ku punon, apo dizajni.
“Arti për mua është gjithçka që më rrethon, gjithçka që ndiej dhe shpreh përmes tij, qoftë përmes muzikës, dizjanit, fotografisë, pikturës”, shprehet Malda për “Iconstyle.al”.
Ajo tregohet e rezervuar sa i përket jetës private, por nuk ngurron të tregojë se cilat janë dy dashuritë më të mëdha.
Intervista e plotë:
-Ka kaluar kohë që kur je shkëputur nga skena dhe të gjithë duan të dinë: Me çfarë je marrë gjatë gjithë kësaj kohe?
Përshëndetje për lexuesit! Është më se e vërtetë që s’kam sjellë këngë të reja për një kohë të gjatë. Jam fokusuar më shumë në profesionin tim si “Graphic Designer”, e gjithashtu në anën time artistike, po besoj se tash e tutje do të punoj më shumë edhe me muzikë.
-Ke punuar me videografikën në KTV. Si është të punosh në “backstage”, pra të punosh për televizionin dhe të mos dalësh në televizion?
Para se të punoja në televizion, nuk ia kisha idenë sa të rëndësishme ishin sekondat, minutat, duhet ta menaxhoje stresin edhe shumë shpesh të përfundoje punë brenda pak sekondash, sepse videografikat janë “on air” gjithë kohës, dhe një gabim i yti shfaqet para miliona njerëzish. Ka qenë një përvojë shumë e mirë për mua, sidomos për fotografinë që unë e adhuroj, në televizion mësova shumë për të.
-Cili është projekti yt i ardhshëm sa i përket muzikës?
Jam duke punuar për këngën e re me kompozitorin Faton Dolakun. Nuk mund ta them datën, po as tematikën sepse dua të jetë surprizë.
-A do ta shohim Maldën në ndonjë festival këtë vit?
Festivalet janë shumë të mira, nëse do të kem një këngë që unë besoj se do të jetë e mirë për festivalin atëherë pse jo…
-Me cilin këngëtar/këngëtare shqiptare do ta doje një bashkëpunim?
Për fat të mirë kemi shumë këngëtarë/e, nuk mundem të veçoj dikë, të gjithë i respektoj të gjithë i kam kolegë.
-Cilat janë këngët “fiksim” që i dëgjon më shpesh këto ditë?
Këngën që po e dëgjoj më së shumti kohëve të fundit është “Kisses Back” nga Matthew Koma, në versionin akustik.
-Tashmë vjen edhe me një look të ri. Ishte ideja jote për ngjyrën e errët të flokëve?
Në fakt po pushoj pak nga ngjyrosja, ngjyra aktuale është natyrale e imja…
-Sa rëndësi i kushton Malda pamjes dhe si vishesh në jetën e përditshme?
Mundohem ta mbaj stilin tim, i cili është klasik dhe sportiv. Normal që më pëlqen të dukem mirë.
-Pa kë produkt bukurie nuk bën dot?
Hmmm pa balsam për buzë nuk rri dot..
-Ke punuar bashkë me nënën Suzana Susuri, një dizajnuese e njohur në Kosovë. Cili është krijimi i fundit që ke bërë me të, ose vetë?
Ne jemi shumë të lidhur si familje, thuajse të gjitha projektet i krijojmë së bashku, mjafton të jetë një ide nga një anëtar i familjes pastaj për përpunimin e saj kujdesemi të gjithë, gjithashtu edhe nani me kreacionet e saj ..
-Ku e gjen më shumë veten, në muzikë, televizion apo dizajnim?
Do të thosha në art. Arti për mua është gjithçka që më rrethon, gjithçka që ndiej dhe shpreh përmes tij, qoftë përmes muzikës, dizjanit, fotografisë, pikturës.
-Cila është ajo gjë që fansat apo miqtë e tu do të surprizoheshin nëse do ta mësonin për ty?
Po besoj që shumë shpejt do të prezantohem me ekspozitën time të parë me fotografinë. Gjithashtu do njoftohen me anën time artistike, e jo me atë të muzikës siç edhe me njohin shumica.
-Ke këmbëngulur për ta mbajtur “sekret” jetën private, cila është arsyeja?
Jeta private e imja më takon vetëm mua.
-A është Malda e dashuruar?
Jam e dashuruar në maçorrët e mi Diegon dhe Charlien.. (qesh)
Burimi: Iconstyle.al
