Në 23 korrik Ministria e Shëndetësisë informoi me anë të disa rreshtave se tamponi për Covid-19 do të kryehet edhe në laboratorët privatë për të gjithë ata persona që do të lëvizin jashtë vendit dhe analiza është kusht për vendin që ata duan të udhëtojnë. Mirëpo, kur kanë kaluar 6 ditë nga ky njoftim, ne jemi ende në tym e me shumë paqartësi rreth këtij vendimi rrufe.
“Iconstyle.al” iu drejtua disa prej instancave dhe personave përgjegjës për këtë çështje dhe sikundër ndodh prej fillimit të epidemisë me mungesën e transparencës, nuk morëm përgjigje konkrete. Fillimisht e vetmja që na kushtoi disa sekonda është zëdhënësja e ministres së Shëndetësisë Etiola Kola, e cila tha as më pak e as më shumë ato që ishin shkruar në njoftimin për shtyp. Teksa insistuam të dimë më shumë rreth çmimit të tamponeve, Kola tha se Ministria e Shëndetësisë miraton procedurat dhe nuk ka lidhje me çmimin.
Të njëjtën përgjigje na dha sot edhe Silva Bino shefe e Epidemologjisë në ISHP, e cila në një prononcim për ‘iconstyle.al’ u shpreh se për këtë gjë duhet të pyesim Ministrinë e Shëndetësisë. E në këtë mënyrë pandemia shndërrohet në një lojë ping-pongu, ku institucionet ia delegojnë përgjegjësitë njëra-tjetrës. Për çmimin nuk kemi ende informacione në rrugë zyrtare, por paraprakisht kemi mësuar se për të kryer një tampon në privat një shqiptari do i duhet diku te 95 euro dhe një çmim i tillë në shumë raste kushton më shumë se bileta apo shpenzimet e udhëtimit.
Në një kohë kur shqiptarëve legjislacioni u parashikon se në rast epidemie, diagnoza dhe kura për të sëmurët duhet të ofrohet pa diskriminim dhe falas, si nga institucionet publike, ashtu dhe nga ato private, nuk i dimë arsyet se përse Ministria e Shëndetësisë dhe ISHP ia deleguan këtë përgjegjësi privatit, duke krijuar procedura të pakuptimta që në fund të ditës përkthehen në shpenzime të kota në një moment kur shqiptarët janë të dërrmuar ekonomikisht.
Sakaq, deri tani nuk kemi ende një njoftim mbi laboratorët ku ne mund t’i kryejmë këtë analizë, teksa në pikëpyetje të madhe mbetet edhe fakti nëse tamponi do njihet nga vendet pritëse. Sepse në kushtet kur këto laboratore nuk janë certifikuar nga OBSH, sikundër ndodh me çdo laboratorë në botë ku bëhen testimet e Covid-19, kush na siguron se këto tampone në dukje të pavlera do na njihen në pikat kufitare?
