Në Shqipëri jetesa është bërë mjaftë e papërballueshme edhe për ato familje anëtarët e së cilave janë në punë dhe paguhen me paga mesatare.
Kjo për shkak të rritjes së vazhdueshme dhe herë-herë spekulative të çmimeve të produkteve ushqimore, lëndëve djegëse dhe shërbimeve, në një kohë që janë në proporcion të zhdrejtë me rritjen e të ardhurave.
Për pasojë, Shqipëria u rendit e katërta në Europë për “Rritjen e Përgjithshme të Çmimeve” në muajin tetor, sipas metodologjisë së Eurostat (Institutit Europian të Statistikave).
Në këtë shtrenjtim kanë ndikuar edhe kriza ekonomike e stimuluar këtë vit edhe prej pandemisë së koronavirusit.
Ndryshimi vjetor i matur nga Indeksi i Harmonizuar i Çmimeve të Konsumit në muajin tetor 2020 është 2,9%.
Grupet që preku rritja
Rritja më e madhe e çmimeve prej 6,6% vërehet në grupin “Ushqime dhe pije joalkoolike”, pasuar nga grupet “Transporti” me 3,4%, “Pije alkoolike dhe duhan” me 1,5%, “Mallra dhe shërbime të ndryshme” me 1,1%, “Mobilim, pajisje shtëpie dhe mirëmbajtje” me 0,6%, “Hotele, kafene dhe restorante” me 0,5%, “Komunikimi” me 0,4%, “Qira, ujë, lëndë djegëse dhe energji” me 0,3% dhe “Argëtim dhe kulturë” me 0,1%.
Nga ana tjetër, çmimet e grupit “Veshje dhe këpucë” u ulën me 0,7%, pasuar nga grupet “Shëndeti” dhe “Shërbimi arsimor” me 0,1% secili.
Në muajin tetor 2020, ndryshimi mujor i matur nga “Indeksi i Harmonizuar i Çmimeve të Konsumit” është 0,3%. Ky ndryshim është ndikuar kryesisht nga rritja e çmimeve të grupit “Ushqime dhe pije joalkoolike” me 0,8%, pasuar nga grupet “Veshje dhe këpucë” me 0,3%, “Mobilim, pajisje shtëpie dhe mirëmbajtje” me 0,2%, etj.
Nga ana tjetër, çmimet e grupit “Argëtim dhe kulturë” u ulën me 0,3%, pasuar nga grupet “Transporti” me 0,2%, “Pije alkoolike dhe duhan” dhe “Shëndeti” me 0,1% secili.
Matja e inflacionit
Inflacioni i Eurozonës matet mbi bazën e treguesit të IHÇK-së. Termi “i harmonizuar” nënvizon faktin që të gjitha vendet e BE-së zbatojnë të njëjtën metodologji në matjen e treguesit përkatës.
Brenda grupit “Ushqime dhe pije joalkoolike” produktet kanë ndryshueshmëri nga një tregues në tjetrin.
Kështu, brenda këtij grupi, nëngrupi “Fruta-Perime”, ka një peshë më të madhe te shporta e IHÇK-së (12.84% e shportës totale), sesa tek ajo e IÇK-së (8.44% e totalit).
Nëngrupi “Fruta-Perime”, ka krijuar 1.3 pikë përqindje ose më shumë se 80%, të diferencës së inflacionit të matur sipas dy treguesve (3.84% kundrejt 2.38%).
Por ndërkohë që në muajt e fundit çmimet e produkteve jetime për shqiptarët kanë “fluturuar” duke u shtrenjtuar, e kundërta ka ndodhur me të ardhurat.
Nga karantina e zgjatur dhe e pastudiuar 2-mujore një pjesë e bizneseve falimentuan dhe një pjesë tjetër u detyruan të shkurtojnë ndjeshëm stafet. Kjo bëri që mijëra individë të humbisnin vendet e punës, në një kohë që shumë të tjerë u paguan vetëm me 50% të pagës.
Eurostat edhe më herët ka konstatuar në anketimet e tij se, të ardhurat për familjet dhe individët në Shqipëri janë pakësuar, ose nuk janë rritur prej kohësh. Për pasojë, pjesën më të madhe të tyre, shqiptarët e kanë shpenzuar për produktet jetike bazë, të cilat gjithashtu janë shtrenjtuar muajt e fundit.
/Burimi: Eurostat/ Përshtati: Iconstyle.al/
