Në sa vende mund t’ju çojë pasaporta pa pasur nevojë për vizë? Në varësi te pasaportës që posedon mund të kesh akses nga 26 në 192 vende.
Ekziston një hendek në rritje midis veriut global dhe jugut global, kur bëhet fjalë për liritë e udhëtimit, sipas raportit të parë për vitin 2022 të Henley & Partners, një firmë globale këshilluese për shtetësinë, me qendër në Londër.
Indeksi i pasaportave Henley, i bazuar në të dhënat nga Shoqata Ndërkombëtare e Transportit Ajror (IATA), ka monitoruar periodikisht pasaportat më miqësore për udhëtimet në botë që nga viti 2006. Indeksi përfshin 199 pasaporta dhe 227 destinacione udhëtimi.
Indeksi nuk merr parasysh kufizimet e përkohshme, kështu që duke lënë mënjanë aksesin aktual të udhëtimit, mbajtësit e pasaportave të Japonisë dhe Singaporit kryesojnë listën, të cilët janë ën gjendje , teorikisht, të udhëtojnë pa viza në 192 destinacione. E thënë ndryshe 166 destinacione më shumë se shtetasit afganë, të cilët renditen në fund të indeksit, ku mund të hyjnë në vetëm 26 vende.
Renditja e top 10 mbetet praktikisht e pandryshuar, ndërsa hyjmë në tremujorin e parë të vitit 2022.
Koreja e Jugut është e barabartë me Gjermaninë në vendin e dytë (me një rezultat prej 190) dhe Finlanda, Italia, Luksemburgu dhe Spanja janë të gjitha së bashku në vendin e tretë. (me akses në 189 vende).
Vendet e BE-së dominojnë në krye të listës si zakonisht, me Francën, Holandën dhe Suedinë që ngjiten një pikë për t’iu bashkuar Austrisë dhe Danimarkës në vendin e katërt (me një rezultat 188). Irlanda dhe Portugalia janë në vendin e pestë (me 187 vende).
Shtetet e Bashkuara dhe Mbretëria e Bashkuar, të cilat mbanin vendin e parë së bashku në vitin 2014, kanë rifituar pak terren. Ato janë ngjitur në vendin e 6, së bashku Zvicrën, Norvegjinë, Belgjikën dhe Zelandën e Re.
Në vendin e shtatë renditen: Australia, Kanadaja, Çekia, Greqia dhe Malta.
Vendet e Europës Lindore përbëjnë pjesën tjetër të 10-shes së parë. Hungaria dhe Polonia janë ngjitur në vendin e tetë, Lituania dhe Sllovakia janë ngjitur në vendin e 9-të dhe Estonia, Letonia dhe Sllovenia janë në vendin e dhjetë.
Shqipëria dhe vendet e rajonit
Shqipëria dhe Kosova mbajnë pasaportat më pak të fuqishme në rajon.
Poseduesi i një pasaporte shqiptare aktualisht mund të udhëtojë pa viza në 114 vende. Shqipëria renditet në vendin e 49, ndërsa Kosova renditet në vendin e 103, ku mbajtësit e saj mund të udhëtojnë në vetëm 40 vende pa vizë.
Serbia renditet në vendin e 36, me akses në 135 vende, Maqedonia e Veriut në vendin e 42 me 125 destinacione dhe Mali i Zi në vendin e 43, ku shtetasit malazezë mund të udhëtojnë në 123 vende pa vizë.
Pasaportat më të fuqishme në vitin 2022 janë:
- Japoni, Singapori (192 destinacione)
- Gjermania, Koreja e Jugut (190)
- Finlanda, Italia, Luksemburg, Spanja (189)
- Austria, Danimarka, Franca, Holanda, Suedia (188)
- Irlanda, Portugalia (187)
- Belgjika, Zelanda e Re, Norvegjia, Zvicra, Mbretëria e Bashkuar, Shtetet e Bashkuara (186)
- Australia, Kanadaja, Republika Çeke, Greqia, Malta (185)
- Polonia, Hungaria (183)
- Lituania, Sllovakia (182)
- Estonia, Letonia, Sllovenia (181)
Pasaportat më të dobëta për tu mbajtur
- Koreja e Veriut (39 destinacione)
- Nepali dhe territoret palestineze (37)
- Somalia (34)
- Jemeni (33)
- Pakistani (31)
- Siria (29)
- Iraku (28)
- Afganistani (26)./ CNN
