Sot inaugurohet aeroporti më i madh në botë dhe ndodhet kaq pranë vendit tonë. Aeroporti është një mega-projekt i presidentit turk, Recep Tayyip Erdogan dhe ndërsa ishte parashikuar që të hapej sot, përfundimi i tij do të vonohet edhe për shkak të grevës së punëtorëve, për kushtet e këqija të punës.
Projekti 10.5 miliardë dollarë do ta kthejë Stambollin në një nga lidhjet më të rëndësishme botërore mes Evropës, Azisë dhe Afrikës, ndërsa e kthen kompaninë fluturuese “Turkish Airlines” në një gjigand të aviacionit.
Aeroporti fillimisht do të ofrojë fluturime në pesë destinacione, deri në hapjen e plotë të tij më 29 dhjetor, nga kur pritet të përballojë deri në 90 milionë pasagjerë në vit, për t’u rritur në 200 milionë kur projekti të përfundojë në 2028-n.
Ky aeroport pritet të renditet mes pesë aeroporteve më të mëdhenj në botë dhe është ndërtuar në një zonë të Stambollit të quajtur “Arnavutkoy”, që në shqip do të thotë “Fshati i shqiptarëve”.
Aeroporti është ndërtuar në një sipërfaqe prej më shumë se 76 milionë metrash katrorë.
Kompleksi gjigand pritet të përfundojë plotësisht në 2023-shin dhe ai do të ketë një kapacitet prej 500 avionësh që, do mund të lëvizin në pista të ndara dhe rreth 200 milionë pasagjerë vjetorë, gjithashtu përmban një parkim të hapur dhe të mbyllur ku mund të qarkullojnë rreth 70.000 makina.
Përveç pistave të avionëve, në të do të jetë gjithashtu edhe kompleksi më i madh “duty-free” në botë, me një sipërfaqe rreth 53.000 metra katrorë, ku mes të tjerash do të gjendet disa nga dyqanet më luksoze.
Udhëtimi i parë do të jetë drejt kryeqytetin turk Ankara më 31 tetor, ndërsa fluturimi i parë ndërkombëtar me Republikën Turke të Qipros Veriore, ditën e parë të nëntorit.
Burimi: AFP
