Shqipëria do të ndalojë importin e autoveturave me moshë më të madhe se 10 vite, si dhe ato të cilat nuk përmbushin normën e motorit “Euro 4”, nga data 2 dhjetor 2018. Sakaq, për mjetet e tjera si kamionët, autobusët dhe motorët, lejohen që të kenë të paktën 15 vite vjetërsi.
“Pas orës 12 të natës së datës 1 dhjetor nuk do të lejohet importimi i autoveturave, të cilat kanë moshë më të madhe se 10 vite. Padyshim, edhe norma e motorit duhet të jetë Euro 4. Ka pasur më shumë fluks, sepse subjektet që merren me tregtimin e autoveturave të përdorura kanë qenë të interesuar që të importonin sasi më të mëdha autoveturash, t’i kishin gjendje për t’i shitur pas hyrjes në fuqi të vendimit të qeverisë”, tha Denis Shabani, drejtor i Doganës Durrës.
Drejtori i doganës në Durrës i bën thirrje qytetarëve që të kenë kujdes, kur porosisin automjete të përdorura nga jashtë shtetit.
“Qytetarët duhet të bëjnë kujdes që në momentin që do të porosisin një makinë. Për ta blerë një makinë në vende të tjera duhet të kenë parasysh që mosha e makinës të mos jetë më e madhe se 10 vite në momentin e importit”, tha Shabani.
Për automjetet e përdorura që kanë hyrë para datës 2 dhjetor dhe që janë zhdoganuar, afati i targimit është 1 marsi i vitit 2019. Ndërkohë, për autoveturat e pajisura me targa dhe leje qarkullimi nuk ka kufizim moshe për të lëvizur në rrugët e Shqipërisë dhe as nuk ndalohet shitja.
Burimi: Top Channel
