Largimi i Besa Shahinit nga posti i ministres së Arsimit vijon të jehojë në media! Sado që nuk ishte i papritur si lajm, duke qenë se vetë ministrja kishte paralajmëruar edhe më herët për dorëheqjen, koha që zgjodhi për t’u larguar kur mijëra nxënës u rikthyen në mes të pandemisë në shkollë, e ngarkon pashmangshmërisht me përgjegjësi.
“E hoqën apo iku vetë?”, “Dha dorëheqjen apo u shkarkua?” janë disa nga pyetjet që shtrohen sot në media gjithandej, një ditë pasi ministrja njoftoi se pas 3 vitesh angazhimi në Shqipëri, do të kthehej te familja e saj në Kosovë.
Por më së shumti, ajo që tërhoqi vëmendjen e të gjithëve ishte arsyetimi i largimit të ministres, e cila u shpreh qartë se ishte sulmuar për shkak të prejardhjes dhe dialektit të saj verior.
“Jam zhgënjyer me të gjithë ata që kanë punuar kundër këtij projekti të madh. Ka qenë e paimagjinueshme për mua që opozita do të ngrihej nga dita e parë të sulmojë prejardhjen dhe dialektin tonë. Të thuhet se shqiptarët që flasin dialektin Kosovar (apo verior) janë më pak inteligjent apo me pak të mençur, është epitomi i racizmit. Natyrisht, s’mund të quhet racizëm se jemi i njëjti komb, por që janë përdorur taktika të njëjta, kjo nuk mund të mohohet”, shprehej Besa në fjalën e saj.
Por a u paragjykua Besa Shahini për shkak të dialektit të saj verior?
Pavarësisht qëllimit të mirë në funksion të një ideje të bashkimit kombëtar, vendosja e një aktivisteje nga Kosova në krye të Ministrisë së Arsimit në Shqipëri, nuk u paragjykua më shumë sesa pamundësia e saj për të bërë detyrën e ministres.
Besa Shahini e mori postin e ministres pas protestave të mëdha studentore të dhjetorit të vitit 2018, dhe punoi me Paktin për Universitetin, i cili përfshinte në vetvete investimet në infrastrukturë, ndërhyrjet në cilësi të arsimit, bursat, përgjysmimin e tarifave etj.
Por në fjalimin e saj të largimit ministrja vuri në dukje se fatkeqësisht nuk mundi të bënte më tepër për këta studentë, si dhe shprehu zhgënjimin për mungesën e një integriteti akademik në universitete.
“Ekziston një mospërputhje mes nevojës për të ruajtur autonominë akademike në universitete dhe mënyrën se si universitetet e kanë përdorur këtë autonomi, shpesh në kundërshtim me përpjekjet për rritje të cilësisë së arsimit. Duhet të gjendet mënyra për të detyruar universitetet që të sigurojnë integritet akademik. Ky është një premtim që ia kemi dhënë studentëve dhe forma e vetme për të bërë kapërcimin në përmirësimin e cilësisë së arsimit”, shprehej Besa Shahini.
Vërejtjet që kishte, dhe që ndoshta fshehin atë arsyen e largimit, ministrja i tha dhe me zë të lartë, në bisedën e fundit në Kryeministri me Ramën, teksa po ia kalonte detyrën deputetes së Elbasanit, Evis Kushit. Shahini i tha kryeministrit, se këtej e tutje ajo do të angazhohej për një të majtë të re, demokratike dhe jo demagogjike, një të majtë që i angazhon femrat përtej thjesht përfaqësimit:
“Do angazhohem për një të majtë te re, demokratike, jo populiste, jo demagogjike. Një të majtë që e ngërthen në vete diskursin feminist përtej vetëm përfaqësimit”, u shpreh ajo, ndërsa kryeministri ia ktheu si për ta korrigjuar: “E majta jonë pra”!
Pra largimi i Besës sado që u fsheh pas arsyeve personale ose pas paragjykimeve për dialektin, erdhi pas zhgënjimit të saj për pamundësinë e të bërit më tepër për arsimin.
Me gjithë dëshirën e mirë dhe nacionaliste për unifikimin e programeve mësimore të Shqipërisë me Kosovën, Besa Shahini dështoi me sukses, dhe jo për faj të dialektit! Besa edhe iku, edhe e hoqën!
Edhe në fund të fjalimit të saj ajo e quan të papërmbushur misionin për bashkimin arsimor, kulturor dhe ekonomik të shqiptarëve nga Kosova në Shqipëri ndaj edhe për këtë arsye, tha se nuk do të ndalojë kurrë së punuari drejt afrimit të kombit, por sigurisht këtë nuk do ta bëjë nga Shqipëria.
“Është dhurata më e mirë që mund t’ia lëmë gjeneratave që vijnë”, përfundoi Besa në fjalën e saj!
/Iconstyle.al
