Çdo javë, iconstyle.al do të udhëtojë së bashku me ju në destinacione të ndryshme nëpër botë, në një rubrikë që synon të përfshijë të apasionuarit pas udhëtimit, por duke shërbyer gjithashtu si një guidë për këdo që i ka këto destinacione në listën e vendeve për të vizituar.
“Parisi është gjithnjë një ide e mirë!”- thotë Audrey Hepburn në filmin “Sabrina”, shprehje kjo që do të bëhej ndër më të përdorurat përsa i përket kryeqytetit francez. Dhe jo më kot! Arsyeja se përse Parisi është gjithnjë një ide e mirë është shumë e thjeshtë: Është magjepsës në çdo stinë apo muaj të vitit që mund të zgjedhësh ta vizitosh.
Në pranverë kur të gjitha rrugët janë gjelbëruar dhe në verën e nxehtë, qyteti gumëzhin nga turistët, por pritja pak më gjatë në radhë për të vizituar pikat kyçe turistike nuk është asgjë krahasuar me gjallërinë fantastike që ka qyteti në këtë periudhë.
Shko në vjeshtë dhe ditët e zymta në fakt do të të duken si më romantiket në rrugicat e mbuluara, ose në dimër kur mbase mund të kesh fatin të shohësh qytetin e dashurisë të veshur me dëborë.
Parisi është gjithnjë gati të të mirëpresë, për të të ofruar çdo herë një eksperiencë të re.
Çfarë të bësh në Paris
Ec, ec dhe vetëm ec!
Parisi shquhet për një sistem të transportit publik ekselent dhe padyshim që do të të duhet të marrësh shpesh metronë duke qenë se është një qytet i stërmadh. Por nëse koha të premton, ec sa më shumë. Të jesh i sigurt se përfshirja në atmosferën e këtij super qyteti dop ta mundë lodhjen. Mund të kesh dëgjuar se parizienët, veçanërisht gratë, i kushtojnë tepër rëndësi stilit dhe një palë këpucë elegante me takë mund të të duken domosdoshmëri. Por mos bjer në kurth! Eleganca sigurisht është një plus i madh, por në radhë të parë, komoditeti. Për të mos pasur pamje tipike të turistit, vish një palë këpucë të rehatshme dhe mundohu të ruash një look sa më të pastër e të thjeshtë.
Endu brigjeve të Senës për të parë bukinistët dhe shiko si i kalojnë parizienët orët e lira pas pune.
Mund të të pëlqejë! Gjithashtu premtoji vetes së do të rikthehesh sërish për të parë gjithçka që të ka mbetur pa parë (si Notre-Dame që aktualisht është e mbyllur për shkak të punimeve).
Vizito muzeun më fantastik në botë
Nuk mund të shkosh në Paris dhe të mos vizitosh Luvrin. S’do ia falje vetes, pavarësisht radhës së stërgjatë! Muzeu i Luvrit është shtëpia e koleksionit më të madh në botë të veprave të artit dhe është thjesht i pafundmë. Ndaj nëse nuk do të të kapë paniku kur të jesh në brendësi dhe të kuptosh se sa gjigant është, bëj një listë paraprake të vepravve që do të shikosh dhe mos u përpiq ta shohësh të tërin sepse nuk do t’ja dalësh!
Sigurisht nuk mund të lësh pa parë Mona Lizën e famshme, Venusin e Milos, Fitoren me flatra apo kryeveprën e Delacroix “Liria i prin popllit”. Pranë muzeut do të gjeni dhe qendrën tregatre “Carrousel du Louvre”, pjesë e së cilës është dhe piramida e famshme prej xhami .
Kulla Eiffel
Simboli i Parisit padyshim nuk mund të lihet pa parë, por merreni këtë me disa rezerva. Nëse më parë mund të vizitohej lirisht, që prej sulmeve terroriste kulla Eiffel ashtu si shumë pika të tjera turistike i është nënshtruar masave të rrepta të sigurisë dhe për t’u ngjitur në të, radha është e pafundme, sidomos në verë e pranverë. Por edhe pse padyshim duhet parë, ngjitja në kullë nuk është domosdoshmëri, pasi përveçse e keni ndarë mendjen për të konsumuar një vakt me pamjen e mrekullueshme që kulla ofron, ka vende të tjera të cilat të lejojnë të shohësh të gjithë qytetin në pëllëmbë të dorës.
Një prej tyre është kulla Montaparnasse, qiellgërvishësja e vetme në Paris me një lartësi prej 210 metrash, me një tarracë që të ofron pamje mahnitëse të kryeqytetit francez.
Parqet mbresëlënëse
Parisi ka një mori parqesh, por ndër më mbresëlënësit janë padyshim Jardins de Tuileries, Jardin du Luxembourg dhe Jardin des Plantes.
Mundësisht në një ditë me diell, mund të kalosh orë të tëra relaksi në një prej këtyre parqeve të mrekullueshme qoftë edhe duke ndenjur në një prej karrigeve metalike tipike të gjelbra për të soditur, duke u endur mes luleve e pemëve të pafundme për shëtitje ose duke bërë një piknik si parizienët në ditët e pushimit.
Magjepsu në Montmartre
Padyshim në prej lagjeve më të bukura e piktoreske që mund të kesh parë ndonjëherë. Në Montmartre do të provosh realisht atmosferën tipike pariziene për të cilën ke ëndërruar duke parë filma, pasi në këtë zonë kanë jetuar e punuar disa prej artistëve më të mëdhenj në botë si Modigliani, Picasso e Monet, ndaj sharmi i kësaj lagjeje është i pamohueshëm. Me rrugicat e ngushta dhe dyqanet e lokalet e renditur njëri pas tjetrit, Montmartre do të të magjepsë. E vendosur në një kodër të lartë në veri të Parisit, në këtë lagje nuk duhet lënë pa parë dhe Bazilika Sacré-Cœur e ndërtuar në nderim të viktimave të luftës franko-prusiane.
Sheshi para Bazilikës ofron një pamje përrallore të qytetit që s’duhet humbur. Me të zbritur nga Montmartre, zhytu në një atmosferë tërësisht të ndryshme në lagjen Pigalle, në zemër të të së cilës do të gjesh kabarenë e famshme “Moulin Rouge”.
Harku i Triumfit
Një tjetër simbol i Parisit, harku gjigant i frymëzuar nga arkitektura romake është një porosi e Napoleon Bonapartit për të përkujtuar madhështinë e ushtrisë së tij të pathyeshme. Në tarracën e Harkut të Triumfit mund gjithashtu të shohësh një pamje mahnitëse të qytetit. Nga monumetni i famshëm mund të ndjekësh më tej bulevardin “Champs-Élysées”, i cilësuar si bulevardi më i bukur në të gjithë botën, i mbushur me butikë të markave prestigjioze të modës.
Shopping
E ç’kuptim do të kishte një viztië në Paris pa pak shopping cilësor. Për adhurueset e modës, Galeries Lafayette është destinacioni i preferuar me një mori markash nga më të famshmet në të gjithë botën, nga ku është e pamundur të dalësh pa blerë asgjë. Nëse ta ka ënda të llastosh veten, mos ngurro të bësh një vizitë në dyqanet tipike franceze diskrete, pasi nuk do të zhgënjehesh, veçanërisht në parfumeritë artizanale. Ndërsa për më aventurierët një vizitë në tregun e gjërave të përdorura në Saint Ouen, do të sigurojë suvenirin perkfekt për të marrë në shtëpi nga Parisi.
Çfarë të hash në Paris
Parisi mund të ofrojë një nga eksperiencat më të mira të kulinarisë, nëse di ku të shkosh. Ndaj këshilla numër një, është të qëdnrosh larg nga restorantet tipike për turistët me menutë e vendosura përjashtë dhe ushqimet e ilustruara me fotot e mëdha. Këto foto përgjithësisht janë treguesi i një restoranti jo të mirë. Për të gjetur një restorant të mirë me kuzhinë tipike franceze, mundohuni të largoheni pakëz nga atraksionet e mëdha turistike dhe vërini veshin gjuhës. Nëse në tavolinat më të shumta dëgjoni frengjisht, atëherë keni gjetur vendin e duhur.
Çokollata më e mirë në botë
Ke dëgjuar ndonjëherë për çokollatën e shkrirë më të mirë në botë? Gjendet në Paris tek “Angelina”, pastiçieria me famë botërore që daton që në vitin 1903. Një kanë e vogël me çokollatë “L’Africain” vjen e shoqëruar me kremin e ëndrrave dhe pasi e provon, e kupton se reputacionin e ka mëse të merituar. Për të qenë aq e ëmbël, çokollata e famshme vjen me një çmim pakëz të kripur, por është diçka që nuk duhet lënë pa provuar.
Kryevepra të brumit
Nis gjuetinë e bagetës perfekte në Paris për të shijuar bukën më të famshme në botë. Sigurohu që të dy anët e bagetës të jenë me majë dhe jo të rrumbullakosura, pasi kjo tregon se është e bërë në mënyrë artizanale dhe jo me makineri.
Pain au chocolat është një croissant i mbushur me copëza çokollate në brendësi që përgjithësisht është shoqëruesi ideal për kafenë e mëngjesit.
Mundohu të gjesh ëmbëlsira të tilla në pastiçieria po furra artizanale për të provuar më të mirën që mjeshtërit francezë të brumrave mund të ofrojnë.
Fallafel
Është disi e pazakontë duke qenë se fallafel është një ushqim tradiocional i Lindjes së Mesme, por në Paris, ky specialitet vjen në formën më të shkëlqyer. Fallafel është një lloj qofteje krokante nga jashtë e bërë me qiqra, fasule dhe erëza të ndryshme, që shërbehet si ushqim rruge në një pite me hummus, domate, lakër ose përbërës të tjerë në varësi të shijeve. “L’as dy fallafel” është vendi perfekt për ta provuar, në lagjen “Marais”.
Macaroons
Biskotat më të mira në botë. Pikë.
Mos harro rosën
Askush nuk di të gatuajë rosën si francezët. Askush! Dhe nëse do të provosh recetën perfekte me mish rose, provo “Confit de canard”. Për këtë pjatë që është realisht për të lëpirë gishtat, rosa marinohety në kripë e erëza për dis aditë duke u lënë në frigorifer e më pas piqet në yndyrën e vet duke u bërë tërësisht e shkrifët.
