Prej disa kohësh, Rihanna është shkëputur nga muzika për t’u marrë me bizneset e saj por asnjëherë nuk ka harruar pasionin e saj të vjetër.
Që prej vitit 2016, nuk kemi dëgjuar më asnjë projekt të sajin muzikor por pritja do të marrë fund!
Këngëtarja po sjell jo vetëm një këngë, por një album dhe i ka premtuar fansave se do të jetë flakë.
Albumi i ardhëm do të titullohet “R9” dhe ende nuk kemi një datë ekzakte për publikimin e tij.
Megjithatë, RiRi i ka premtuar fansave më herët se do t’ia vlejë pritja e gjatë.
Në një intervistë për “Acces Online” ajo ka rrëfyer:
“Mezi po pres që të publikoj diçka për të cilën jam vërtet krenare dhe e lumtur. Me siguri që do të jetë shumë më shpejt nga sa mendojnë fansat e mi, por nuk dua të jap më shumë detaje sepse kam mjaftueshëm stres dhe pyetje për ‘R9’.
E mbaj mend mirë ditën kur nisa punën për ‘Anti’. Ishte dita ime e parë në studio, pra ishte ende herët. Një paparac më kapi duke hyrë në studio dhe pas kësaj, fansat e mi prisnin me padurim publikimin. Në të kaluarën, unë e kam bërë një album për tre muaj, por tani nuk e kam luksin të bëj një gjë të tillë sepse kam edhe ‘fëmijë’ të tjerë.”- tregoi këngëtarja, duke nënkuptuar kompaninë e saj “Fenty”.
Albumi i 32-vjeçares pritej të publikohej këtë vit, por pandemia Covid-19 prishi shumë plane, mes tyre edhe të Rihanna-s.
Këngëtarja ka bërë me dije se karantina ka qenë një inspirim i madh për të, madje për shkak të karantinës muzika e saj do të jetë në një tjetër nivel.
Kjo pasi Rihanna ka pasur të gjithë kohën e mundshme për t’u përkushtuar siç duhet të këngët e saj dhe për të nxjerrë më të mirën nga vetja.
“Në fillim ishte e çuditshme sepse nuk jam mësuar të qëndroj e mbyllur por gjatë karantinës nuk ke zgjidhje tjetër. Atëherë ju filloni të kuptoni gjatë bllokimit se jeni mbërthyer në mendimet tuaja dhe imagjinatën tuaj dhe kjo me të vërtetë e ndihmoi lulëzimin e krijimtarisë sime”- ka thënë Rihanna.
