Arjeta është një nënë nga Ferizaj që me zemër të thyer doli sot për herë të parë publikisht te “Rudina” për të folur për një nga tragjeditë më të mëdha të jetës së saj.
Para 1 viti e gjysmë, djali i saj 18-vjeçar ndërroi jetë, pasi kishte pasur një mbidozë nga substancat narkotike.
Ajo tregoi se u përpoq për rreth 4 vjet për të shëruar të birin nga varësia që kishte krijuar me drogërat, por nuk ia doli.
Duke e quajtur një nga “sprovat më të mëdha që mund të kenë nënat”, Arjeta tregoi edhe ditën kur i biri ndërroi jetë dhe nuk ishte pranë tij.
Ajo ishte nisur për në Tiranë me të atin për të bërë një kontroll dhe me të bijën. Gjatë rrugës i biri e telefonoi për ta pyetur: “si je?” dhe për t’i thënë “të dua”.
Pas 3 orësh, Arjetën e telefonoi një shoqe për t’i thënë të kthehet pasi djali i saj është në rrezik për jetën. Kur mbërriti, Arjeta e gjeti shtëpinë plot, por jo të birin.
“Mblodha forcat ishte shumë e vështirë”, u shpreh ajo në një intervistë me Rudinën e përlotur.
Pas kësaj eksperience të shimbshme, Arjeta krijoi një qendër këshillimi për t`u ardhur në ndihmë falas jo vetëm përdoruesve, por edhe prindërve të tyre. Ky ishte amaneti i të birit për të ndihmuar të gjithë të rinjtë që po vuanin njësoj si ai.
/Klan
