Ditën e sotme një 25-vjeçar, në zonën e Liqenit të Thatë, ka kërcënuar se do të hidhet nga çatia e shtëpisë pasi ajo rrezikonte të shembej nga INUV, duke qenë se ishte në një zonë të mbrojtur. Situata është përkeqësuar në momentin kur INUV ka shembur murin rrethues të shtëpisë.
25-vjeçari ka realizuar një lidhje telefonike me studion e lajmeve të “News 24” . Mes tij dhe gazetares Nisida Tufa është zhvilluar një bisedë e pazakontë.
Ndërsa i riu ishte në majë të çatisë dhe po kërcënonte të vetëflijohej gazetarja ka bërë një pyetje që i shokoi të gjithë në ato momente.
“A mendon se kjo është kthyer në modë…nuk them…”, tha gazetarja.
Ndërkohë i riu është revoltuar duke thënë se e kishte seriozisht këtë që po bënte.
“Unë nuk po bëj show… E kam seriozisht…Jam me të drejtat e mia. Është e padrejtë kjo që po bëhet. Jeta ime mori fund.”, u shpreh 25-vjeçari në lidhje telefonike.
Djali pretendonte se shtëpia kishte dokumentacion të rregullt dhe nuk duhej prishur. Ndërkohë në fund gazetaria i është lutur të zbriste nga çatia.
“Të lutem zbrit që andej, se do të gjendet një zgjidhje. Të lutem mos lëviz”, i tha Nisida të riut.
