Pak kohë më parë, një video ku shfaqej deputeti i Partisë Demokratike Ervin Salianji teksa shkëmbente mesazhe me “GD”, tronditi gjithë opinionin publik. Në videon që u bë publike, portalet supozuan se “GD”, me të cilën Salianji shkëmbente mesazhe me përmbajtje banale dhe erotike, ishte deputetja e Partisë Demokratike Grida Duma.
Kjo e fundit, ishte e ftuar ditën e sotme në studion e emisionit “Rudina” në televizionin “Klan”, ku foli për herë të parë mbi baltosjen që iu bë nëpër portale.
“Janë momente të vogla ato dhe besoj se çdo njeri i ka ato reflektime. Them se e kam ndjekur thirrjen që kam brenda vetes time: Po unë dua të përçoj një mesazh. Por a është politika aura më e mirë? Duket se në Shqipëri politika ka privatizuar çdo gjë dhe media gjithashtu. Ka disa momente të vogla siç është baltosja nëpër portale. Është një kosto mendore, pa diskutim. Por kush është kosto mendore, që disa njerëz po të shajnë? Jo, asnjë problem nuk kam me këtë. Gjithmonë duhet të bëjmë numërimin që ka 3 njerëz që na shajnë, ndoshta dhe 300, por janë 3.000 apo 300.000 ato që na duan. Por e mirëkuptoj baltosjen deri në një masë të caktuar sepse njerëzit kanë nevojë të shfryjnë dhe mund të jetë të painformuar apo me një zili si pasojë e jetës së keqe. Edhe nëse ne do të bënim një dialog të gjatë a do të gjenim një personazh të vetëm të cilin ky vend nuk e ka baltosur? Edhe njerëzit me të cilët jemi nderuar me çmime ndërkombëtare nuk i kanë shpëtuar baltosjes. Nuk i ka shpëtuar askush.” – u shpreh deputetja e Partise Demokratike Grida Duma.
