Ina Nuka, efektivja e forcave “Shqiponja” që mbeti e plagosur gjatë protestës së banorëve të Astirit më 22 nëntor 2018, ka marrë sot “Medaljen e Nderit” nga ministri i Brendshëm, Sandër Lleshaj.
Në ceremoninë që u mbajt në Ministrinë e Brendshme, ishin të pranishëm drejtuesit më të lartë të Policisë së Shtetit dhe disa kolegë të repartit “Shqiponja”.
Pasi falënderoi Nukën për kontributin e dhënë në shërbim të qytetarëve, ministri i Brendshëm lajmëroi se do të ketë shpejt ndryshime në Kodin Penal.
Ai u shpreh se do të ashpërsohet masa e dënimit për personat që ngrenë dorë kundër punonjësve të Policisë së Shtetit në detyrë.
“Dua ta shfrytëzoj këtë moment për t’ju falënderuar ju, Ina, për kontributin e dhënë, për modelin e mirë që keni treguar, për angazhimin tuaj në shërbim të qytetarëve, ndonëse nga qytetarë të papërgjegjshëm keni pësuar një dëm që shpresoj të jetë reduktuar tashmë me kalimin e kohës. E kam thënë dhe herë të tjera, që ndjehemi mirë që kemi oficerë policie të tillë që kanë përkushtim, kanë patriotizëm, kanë kurajë, kanë profesionalizëm dhe për këtë arsye kam vendosur që në shenjë mirënjohje t’ju akordojë një “Medaljen e Nderit” të Ministrit të Brendshëm, duke ju thënë që përmes saj shpreh gjithë konsideratat dhe vlerësimin tim si ministër i Brendshëm, por edhe të Ministrisë së Brendshme dhe të gjithë Policisë së Shtetit, për angazhimin tuaj. Shpresoj që këtë angazhim ta vazhdoni edhe më tej duke i dëshmuar dhe duke i perfeksionuar vlerat që ju kanë karakterizuar si dhe duke dhënë shërbim e kontribut për modernizimin e mëtejshëm të Policisë tonë të përbashkët”, u shpreh ministri Lleshaj.
