Mbrëmjen e djeshme një ngjarje e rëndë tronditi kryeqytetin, pasi një i ri mbeti i vdekur në rrugën “5 Maji”.
27-vjeçari Mehmet Qema u qëllua me armë zjarri nga shoku i tij, Marjus Dema. Mësohet se Marjus Dema dhe Frenklin Myftari janë vetëdorëzuar në polici, pas negociatave të policisë me avokatët dhe familjarët e tyre.
Viktima ishte ulur mbrëmë në tavolinat e jashtme të një lokali, së bashku me 5 djem të tjerë, ku kanë qëndruar në shoqërinë e njëri-tjetrit për disa orë. Por teksa autori bënte prova duke mbushur armën, ka qëlluar padashje në drejtim të shokut të tij, i cili ndërroi jetë në spitalin e Traumës.
Grupi i posaçëm hetimor nën drejtimin e Prokurorisë po vijon punën për dokumentimin e plotë të kësaj ngjarjeje.
Mehmet Qema, i njohur me pseudonimin “Tall Man”, ishte i njohuri i shumë personazheve të njohur të showbiz-it, që kanë shprehur sot ngushëllimet e tyre për këtë ngjarje të rëndë.
Qema ishte i njohur me reperët Mozzik e Getinjo, Majk, reperen Baby G, dy vëllezërit Romeo e Donald Veshaj, moderatorin e njohur Meriton Mjekiqi etj.
Vdekja e 27-vjeçarit ka tronditur rëndë opinionin publik, ndërsa të shumtë janë personazhet e njohur që shkruajnë se ende s’mund ta besojnë këtë tragjedi.
