Një e moshuar e mbijetuar e kampit të përqendrimit në Aushvic, tani është një yll i TikTok-ut
Mediat e huaja tregojnë se 97-vjeçarja, e quajtur Lily Ebert, me origjinë hungareze, ka sjellë përmes përmes rrjetit social Tik Tok dëshminë e përjetimeve të saj në kampin e ferrit, tek të rinjtë.
Stërnipi i gruas, Dov Forman, në muajin shkurt hapi një llogari në të cilën Lily tregon historitë e saj dhe u përgjigjet pyetjeve të përdoruesve ku ndiqet nga 1.2 milionë përdorues.
97-vjeçarja gjeti një mundësi të madhe falë TikTok-ut për të mbajtur premtimin e saj të bërë në prill 1945:
“I premtova vetes që nëse do të mbijetoja, do t’i tregoja botës se çfarë ndodhi në të vërtetë. Dhe e mbajta premtimin tim”.
Ebert u dëbua në 1943 me familjen e saj nga Bonyhád, qyteti i saj i lindjes në Hungari, në Aushvic. Ajo arriti të shpëtojë së bashku me dy motrat e sa, por nuk pati kurrë lajme nga nëna, vëllai dhe një motër tjetër që nga dita kur arritën në kampin e përqendrimit.
Në njërën nga videot e bëra virale në këtë rrjet social, ajo ka thënë se përjetimet e saj të asaj periudhe i dhembin akoma kur u jep zë.
“Ishte e tmerrshme, edhe sot pas më shumë se 75 vjetësh më dhemb të flas për të”.
