Ndoshta ju nuk do ta besoni se nga viti në vit duket sikur Sonny K. Elson ka mbetur i njëjtë, por sot ai është 43 vjeç. Një nga fotografët më në zë në Shqipëri nisi karrierën fillimisht si model në Itali, në vitet 1992.
Djali syjeshilë nisi të shfaqte talentin e lindur në pozim që në atë kohë, kur realizoi fotot e para për disa nga agjencitë e modelingut. Duket se ishte ajo kohë kur Sonny K. Elson vendosi të krijonte një imazh të tijin me flokët e gjatë biond.
Ne të “iconstyle.al” siguruam së fundmi disa foto të adoleshencës së tij, për të cilat vendosëm të kontaktonim fotografin për të na i shpjeguar.
Në foton e parë, Sonny K. Elson sjell ndërmend kujtimet e viteve 1994. Ishte vetëm 19 vjeç, por shumë profesionist në qëndrim dhe mimikën largpamëse.
Ndërsa fotot na tregojnë se ishte i lindur për të qenë model, Sonny K. Elson thotë që hoqi dorë nga kjo fushë kur kuptoi që nuk kishte përfitime.
Por si arriti të shkonte në Itali?
Nëse mendoni se ishte pjesë e grupit të shqiptarëve që u arratisën nga Shqipëria me anije, ju themi që nuk ndodhi kështu.
“Shkova në Itali në vitin 1992 pasi fitova një bursë studimi pasi mbarova gjimnazin. Ishim 33 nxënës. Pasi bëra një vit për infermier, kuptova që nuk ishte shkolla e duhur për mua. E lash dhe më këshilluan fizioterapinë, kuptova që nuk duroja dot spitalet. Më mirë thash të bëj foto të duroj “pjeshkat”, shprehet Sonny K. Elson me humor.
Ndërsa kjo foto është realizuar kur ai ishte rreth 22 vjeç, koha kur ndryshimi në ngjyrën e flokëve i dha një pamje që ne të gjithëve na lidh me të tani.
Ai tregon për “iconstyle.al” se nisi profesionin e fotografisë në vitin 1996, ishte koha kur filloi të studionte për degën “graphic designer”.
“Bleva aparatin e parë 1 milion e gjysmë lireta. Fillimisht punoja me film, se dixhitali erdhi shumë vonë”, tregon Sonny K.Elson.
I përkushtuar në atë që bën dhe gjithmonë me një humor pozitiv, duket se Sonny K.Elson ka gjetur çelësin e jetës së lumtur: bëj atë që do dhe mos u shqetëso për asgjë.
