Policia ka arritur të identifikojë emrin e personit që hodhin mjetin shpërthyes në drejtim të polices Ina Nuka, e për rrjedhojë i këputi gishtat 24-vjeçares. Menjëherë ka nisur kërkimi për të dyshuarin, si dhe po hetohet mënyra sesi protestuesit i siguruan të tilla kapsolla.
Sipas, ekspertëve kriminalistë shashkat e përdorura në protestën e djeshme kanë përmbajtje shumë të lartë baruti, ndryshe nga mjetet e tjera piroteknike. Përveç 11 të arrestuarve, policia e Tiranës pritet të ndalojë dhe procedojë penalisht edhe persona të tjerë në lidhje me protestën e dhunshme para parlamentit.
Më herët, efektivja Ina Nuka rrëfeu për emisionin “Open” momentin e plagosjes.
“Ishim me shërbim te Parlamenti për protestën. Situata agravoi dhe turma nisi të shtynte. Isha në rreshtin e dytë dhe një nga këto plasëset më ra në trup dhe u mundova ta shmang me dorën e djathtë, pasi e kisha në pjesën e qafës”, tregoi Nuka.
Gjendja e 24-vjeçares është normalizuar dhe pritet që së shpejti të dërgohet në Turqi, për të trajtuar gishtat.
