Lideri i Lëvizjes Vetëvendosja dhe ish-kryeministri i Kosovës, Albin Kurti, ka deklaruar dy javë më parë se pas testimit ka rezultuar pozitiv me Covid-19.
Me anë të një postimi në rrjetin social Facebook, Kurti shkruante se kishte shfaqur disa simptoma, dhe pas testimit ka rezultuar se ishte infektuar nga koronavirusi.
E teksa ditët kanë kaluar, duket se Kurti është shëruar dhe e ka fituar betejën me armikun e padukshëm.
Zëdhënësi i LVV-së, Përparim Kryeziu, ka njoftuar se gjendja e kreut të LVV është shumë e mirë dhe se tashmë do të kthehet sërish në punë.
“Dje janë bërë fiks dy javë nga simptomat kryesore. Nga sot e tutje, kryetari Kurti i kthehet angazhimeve dhe aktiviteteve të tij publike”,– tha Kryeziu.
Në Kosovë prej ditësh vazhdon rritja e rasteve ku në 24 orët e fundit janë prekur nga Covid-19 637 persona.
Për shkak të rritjes së rasteve me Covid-19, Qeveria e Kosovës ka paralajmëruar masa të reja kufizuese në gjithë vendin.
