Shumë medikamente janë hequr nga lista e barnave për rimbursim nga udhëzimet e fondit të sigurimeve të detyrueshme të kujdesit shëndetësor. Ndër to është edhe ilaçi që pacientët me probleme kardiake mbajnë nën kontroll hollimin e gjakut. Këta pacientë janë njoftuar nga mjekët e familjes, se duhet ta blenë me çmim të plotë në farmaci.
Në një intervistë për Top Channel, aktori Luftar Paja tregon se është një ndër pacientët që trajtohet me këtë medikament.
“Kur erdhi radha për të marrë trajtimin më tha mjekja që nuk e përfiton se ka disa procedura. Të më heqësh ksarelton mua është të më thuash të shkoj në trombozë, apo të shkoj në varreza të Tufinës apo Sharrës. Unë pensionit jam, nuk më del të blej 100 mijë lekë në muaj këtë ilaç. Do t’i bie në qafë fëmijëve. Mëshirë për ne. Shumë shumë edhe 5 vjet na ka ngarkesë kjo qeveri. Po jetuam dhe 5 vjetë kemi mirë”, shprehet Luftar Paja.
Lista e re e barnave me rimbursim ka bërë që t’u ndërpritet mjekimi edhe pacientëve me diagnoza të tjera.
